Бүгүн култуура улуустааҕы салалтата, «Олоҥхо дьиэтэ» этно-култуурунай киин үлэһиттэрэ, кииннэммит бибилэтиэкэ ситимэ, историяны, кыраайы үөрэтэр улуустааҕы түмэл уонна маастар оҕолорун көҕүлээһиннэринэн СӨ норуотун маастара, II Лөгөй нэһилиэгин бочуоттаах олохтооҕо, бибилэтиэкэ бэтэрээнэ Пелагея Максимова төрөөбүтэ 100 сылынан тэрээһин буолла.
Тэрээһин бастакы чааһыгар «Ийэ сылаас илиитин иэйиитэ» быыстапка турда. Быыстапкаҕа төрүт ииһи, түүлээхтэн аттаран тигиини баһылаабыт маастар Пелагея Степановна айар үлэтэ дьон-сэргэ сөҕүүтүн-махтайыытын ылыан ылла. Кини куобах, андаатар тириилэриттэн тикпит саҕынньахтара, кус түүтүттэн эгэлгэ араас суумкалара, тыс унтуулара, сахалыы таҥастара, о.д.а. эгэлгэ үлэлэрэ сөҕүмэр кэрэхсэбили үөскэттилэр.
Быыстапка үөрүүлээх арыллыытын иилээн-саҕалаан ыыппыт Елизавета Данилова Пелагея Степановна олоҕун, айар үлэтин туһунан сиһилии кэпсээтэ. Пелагея Степановна өр сылларга дойду оҥостон олорбут Тулунатын аатыттан истиҥ ахтыыны бибилэтиэкэр Маргарита Неустроева, оҕолорун ааттарыттан Венера Бочкарева ийэтин туһунан иһирэхтик ахтан, быыстапкаҕа турбут үлэлэрин билиһиннэрдэ. Итиэннэ, улуус дьаһалтатын уонна култуура салалтатын аатыттан Анна Лугинова, Мүрү дьаһалтатын аатыттан Екатерина Бочкарева эҕэрдэлээтилэр.
Салгыы «Иис-күүс алыба» суумка арааһын тигиигэ өрөспүүбүлүкэтээҕи аһаҕас көрүү-күрэс түмүгүн таһааран, кыайыылаахтар наҕараадаланнылар.
Бу күн иккис аҥаарыгар киин бибилэтиэкэ саалатыгар «Күндү чугас дьоммут – ийэлээх аҕабыт!» Аҕа дойду Улуу сэриитин бэтэрээнэ Гаврил Нестерович уонна СӨ норуотун маастара Пелагея Степановна Максимовтар үлэлээн, олорон ааспыт олохторун кэпсиир оҕолоро хомуйан таһаарбыт кинигэлэрин сүрэхтэниитэ буолла.
Мария Аргунова