Саха барыга бары дьоҕурдаах омук буоларын элбэх холобуртан көрөбүт. Бу күннэргэ Бороҕон уола Красноярскай куоракка хоккейга “Русгидро” корпоративнай турнирыгар Саха сирин сүүмэрдэммит хамаандатыгар киирэн, ситиһиилээхтик кыттыбытын туһунан иһиттибит. Ол курдук, хамаанда боруонса мэтээллээх дойдутугар эргилиннэ.
Даниил Христофоров ити турнирга бастыҥ дебютант быһыытынан болҕомтону ылла. Даниил Дьокуускай куоракка “Сулус” Муус дыбарыаһыгар дьарыктанар. “Аан бастаан үс саастаахпар аҕам Бороҕон катогар илдьэн, хаҥкыга туруорбут. Кэлин ити көрүҥү сэҥээрэн, күһүн, саас дьарыктанар буолбутум. Хоккей бары быраабылатын тутуһан, дьиҥнээхтик оонньуохпун олус баҕарарым. Оччолорго Саха сиригэр хоккейдыылларын билбэт этим. Тэлэбиисэринэн эрэ көрөн, дуоһуйарым. Улаатыыбар Бороҕоҥҥо “Смена” диэн каток арыллан, салайааччыта Дмитрий Ефимов баҕалаах уолаттары ыҥырбыта. Онно дьарыктанан, куоракка “Эллэй Боотур” Муус дыбарыаһыгар киирэр дьолломмуппут. Үөрэхпиттэн быыс булан, куоракка киирэн, катокка дьарыктанар буолбутум. 2021 сыллаахха тохсус кылааһы бүтэрэн, хоккейдыыр баҕалаах куоракка көспүтүм. “Якбор” хамаанда бэтэрээн-оонньооччулара Ариан Дегтярев, Петр Степанов уонна да атын аҕа саастаах оонньооччулар өйөөннөр, хоккеист анал форматын кэппитим. Онтон ыла тапталлаах дьарыкпыттан илиибин араара иликпин”, — диэн Даниил сэһэргиир.
Даниил билигин “Энергосбыт” тэрилтэҕэ ОПРЧК диэн салааҕа электроэниэргийэни атыыга батарыы агенынан үлэлиир. Этиллибитин курдук, үлэтин таһынан “Сулус” Муус дыбарыаһыгар дьарыктанар. Хамаанда састаабын аҥаара Уус Алдантан төрүттээх уолаттар буолаллара үөрдэр. “Спордунан дьарыктаныҥ, иннигит хоту баран иһиҥ. Оччоҕуна кыайыы кэтэһиннэриэ суоҕа. Чуолаан хоккей көрүҥэ хамаанда тыынын ыларга, бииргэ оонньуур дьонуҥ иннигэр эппиэтинэһи ылынарга үөрэтэр. Эти-сиини, кһһүһ-уоҕу таһынан толкуйдуур дьоҕуру сайыннарар”, — диир эдэр спортсмен. Кэпсэтиибит түмүгэр Даниил “Кто кого? Якбор — чемпион!” диэн дьаралыгы ааҕааччыларга, бука диэн, тиэрдээр дуу? Туһааннаах уолаттар көрөн, үөрүөхтэрэ” диэтэ. Онон бары хоккейы таптааччыларга саха уолун ситиһиитинэн уруй-айхал буоллун!
Уйаара КУСТУК