Төһө да сайынын үөрэх дьыла түмүктэнэн, үгүс киһи уоппускаҕа баран, улууспут киинэ Бороҕон мэктиэтигэр иһийбит курдук чуумпурдар, дьон кэлэрэ-барара, сырыы-айан аҕыйаатар, тутуу үлэтэ син-биир күөстүү оргуйа турар. Ол курдук бу күннэргэ Окоемов аат. уулуссаҕа 73 №-дээх элбэх кыбартыыралаах дьиэ аттыгар оҕо оонньуур былаһаакката силигэ ситэн, үөрүүлээх быһыыга-майгыга арыллара чугаһаабыт, оттон Бороҕоммут килбэйэр киинигэр киэн туттар Лөгөй Тойон аатынан болуоссаппыт олоччу көтүрүллэн саҥалыы сөргүтүллэ турар уонна Колхознай уулуссаҕа «Хаарбах дьиэттэн көһөрүү» бырагырааманан түөрт этээстээх 58 кыбартыыралаах дьиэ дэндэйэн эрэр. «Мүрү саһарҕата» хаһыат редакцията бу тутуулар хаамыыларын туһунан билистибит.
Оҕо былаһаакката
Окоемов аатынан уулусса Бороҕон Мүрү эбэни кытта силбэһэр кытыы уулуссата буолар. Манна үс этээстээх элбэх кыбартыыралаах таас дьиэ турар. Билигин дьиэ тутарга аттыгар былаһаакка булгуччу ирдэнэр буоллаҕына, бу дьиэ урукку тутуу буолан, былаһаакката суох этэ. Билигин ол итэҕэһи туоратаннар, аныгылыы көстүүлээх бэртээхэй былаһаакка үлэҕэ киирээри турар.
Бу туһунан сүрүн үлэни толорооччу, урбаанньыт Дмитрий Егоров иһитиннэрэр:
– Үлэбитин саас саҕалаабыппыт уонна тутатына улахан аҥаарын бүтэрдибит диэххэ сөп. Бырайыакка киирбит сорох тэриллэрбит соҕурууттан кэлэ иликтэр, ол кэллэ да бүтүөҕэ. Былаанынан, балаҕан ыйын 1 күнүгэр бүтэриэхтээх этибит, биһиги эрдэлээтибит. Былаһааккаҕа кыра оҕотуттан улаханыгар тиийэ оонньуур, дьарыктанар кыахтаныахтара. Ол курдук хачыал хас да көрүҥэ, карусель, сырылыыр сир бааллар, орто уонна улахан саастаах оҕолорго воркаут-зона, былаһаакка ортотугар ураһаҕа майгылыыр ыскамыайкалаах сынньанар сир.
Лөгөй Тойон аатынан болуоссат
Болуоссаты өссө 2022 сыллаахха VIII төгүлүн ыытыллыбыт Саха сирин норуоттарын спортивнай оонньууларын иннинэ тупсаҕай көстүүлээх оҥорбуттара, Лөгөй Тойон өйдөбүнньүгэ турбута уонна өһүөтэ хамсыыр сыана оҥоһуллубута. Онтон ыла Бороҕоммут тэбэр сүрэҕэ буолбута диэтэхпинэ сыыспаппын, таһырдьа ыытыллар тэрээһиннэр барыта кэриэтэ болуоссаттан саҕаланаллара. Ол эрээри биир кыайтарбат учаастак үөскээн тахсыбыта – болуоссаттан дьон сөбүлээн «Палладиум» диэн ааттыыр атыы-эргиэн киинигэр диэри сир лоскуйа сааһыары уонна ардах түстэр эрэ чалбах, бадараан буолан хаалара, дьон да, массыына да сырыытыгар күчүмэҕэйдэри үөскэтэрэ.
Бырайыак чэрчитинэн Лөгөй болуоссаппыт кэҥээн, ити өттүгэр икки этээстээх улахан павильон тутулла турар, бастакы этээһигэр олохтоохторго уонна улуус киинин ыалдьыттарыгар анаан дьиэ кэргэн кафета тэриллэрэ былааннанар, онтон иккис этээһигэр оҕо аралдьыйар, оонньуур саалата буолуоҕа.
Колхознай уулусса 12 №-дээх 58 кыбартыыралаах дьиэтэ
Мүрү нэһилиэгэ кэлиҥҥи сылларга «Хаарбах дьиэттэн көһөрүү» бырагыраамманан күүскэ үлэлии олорор, бүтэһигин быйыл саас Жилой кварталга 8 №-дээх элбэх кыбартыыралаах дьиэ аһыллыбыта. Билигин Колхознай уулуссаҕа саҥа дьиэ тутулла турар. Сүрүн бэдэрээччитинэн «Дохсун» ТХ ХЭТ ылан үлэлэһэр. Бастакы сыбаайата бу дьыл муус устар 18 күнүгэр түспүтэ уонна онтон ыла үлэ тохтообокко бара турар. Ленин уулуссатын устун айаннаан иһэр дьон соһуйа-өмүрэ көрөр – аҕыйах кэм иһигэр түөрт мэндиэмэн күөрэйэ оҕуста.
От ыйын 21 күнүгэр Ил Дархан Айсен Николаев Уус Алдан улууһугар сырыытын бу эбийиэктэн саҕалаабыта уонна үлэ өрө күүрүүлээхтик бара турарын кэрэхсээбитэ.
Тутуу учаастагын маастара Альберт Данилов:
– Түөрт этээстээх каркаснай дьиэни тута сылдьабыт. Билигин эттэххэ, биһиги графикпытыттан бары үлэтин инникилээн иһэбит. Манна үс подъездка арахсан үс биригээдэ үлэлии сылдьар, биирдии биригээдэҕэ – уон киһи. Уматык кыһалҕатын ааспыт нэдиэлэттэн билэн эрэбит, ол эрээри туох баар матырыйаалбыт хойутааһына суох тохтообокко кэлэ турар. Түгэни туһанан, ол онно махтаныам этэ таһаҕаһы тиэйиинэн дьарыктанар бэйэбит уолаттарбытыгар – Афанасий Ширяевка, Валерий Спиридоновка, Дмитрий Алексеевка! Уолаттар кыһаллан туран, бэйэлэрэ сүүрэн-көтөн уматыктарын булунан, үлэ-хамнас бара турарын курдук матырыйаалбытын аҕала тураллар.
Анатолий Кириллин