Бүгүн Бороҕоҥҥо «Хаарбах дьиэттэн көһөрүү» программанан Колхознай уулусса 12 нүөмэригэр 4 этээстээх 58 квартиралаах уопсай дьиэ тутуутун бастакы «көмүс» сыбаайата түһэрилиннэ.
Мүрү нэһилиэгин олохтоохторугар улахан үөрүүлээх тэрээһиҥҥэ улуус баһылыга Василий Алексеев, Мүрү нэһилиэгин баһылыга Прокопий Румянцев, тутуу генеральнай бэдэрээччитэ «Дохсун» тутуу хампаанньатын дириэктэрэ Арсен Ермолаев, саҥа квартираҕа көһөн кэлиэхтээх олохтоохтор ааттарыттан Полина Куличкина саҥа улахан таас дьиэ дэндэйэн тахсан, «үйэлээх тутуу, дьол уйата» буоларыгар баҕа санааларын эттилэр.
Бу уопсайга барыта 58 ыал Лермонтов аатынан уулусса 21, Ленин аатынан уулусса 54 нүөмэрдээх дьиэлэриттэн, Мигалкин, Воробьев, Борогонскай уулуссалар уопсайдарыттан, Чараҥ бөһүөлэгиттэн 4 квартира олохтоохторо көһүөхтэрэ.
Улуус баһылыга Василий Алексеев: «Тутуу олоххо киирэригэр бары үлэлэспит дьоҥҥо, Мүрү нэһилиэгин дьаһалтатыгар махталбын тиэрдэбин. Бу Бороҕоҥҥо, улууска биир улахан тутуу буолуоҕа. Онон саҥа дьиэ тутуута саҕаламмытынан истиҥ эҕэрдэбин тиэрдэбин», – диэн эттэ.
Мүрү нэһилиэгин баһылыга Прокопий Румянцев: «Бүгүн нэһилиэкпит сайдыытыгар улахан суолталаах күн үүннэ. Саҥа толору хааччыллыылаах дьиэҕэ 14 хаарбах дьиэттэн көһөн кэлэн дьоммут-сэргэбит олохторун туруга тупсуоҕа. Ол туһугар тутуу үлэтэ туох да харгыһа суох бардын, маннык үлэ хас биирдии нэһилиэккэ олоххо киирэн, улууспут сайда, үүнэ турдун», – диэн баҕа санаатын тиэртэ.
Олохтоохтор ааттарыттан доруобуйа харыстабылын бэтэрээнэ Полина Куличкина: «Өр күүппүт үөрүүлээх түгэммит үүммүтүнэн улууспут, нэһилиэкпит салалтатыгар махталбытын тиэрдэбит. Итиэннэ саҕаламмыт үлэ тохтообокко этэҥҥэ баран, былааннаммыт болдьоҕор саҥа дьиэбитигэр киириэхпит диэн эрэнэбит», – диэтэ.
Саҥа кыбаартал тэнийиэхтээх сиригэр саҕаламмыт бастакы улахан тутуу былаан быһыытынан 2027 сыл төрдүс кыбаарталыгар үлэҕэ киириэҕэ.
Екатерина Захарова