«Библиосумерки-2025» Бүтүн Россиятааҕы аахсыйа чэрчитинэн оҕо улуустааҕы бибилэтиэкэтин тэрээһинэ муус устар 29 күнүгэр бэрт сэргэхтик, интэриэһинэйдик буолан ааста. Сүрүн тиэмэтэ Аҕа дойду Улуу сэриитин кэмигэр Саха сиригэр авиация историятыгар ананна, тэрээһини коллекционер Станислав Луковцев авиацияҕа анаммыт баай ис хоһоонноох быыстапката киэргэттэ.
Итиэннэ Мүрүтээҕи уолаттар гимназияларын 5-с кылааһын үөрэнээччитэ Айал Атласов сөмөлүөттэрин коллекциятын уонна саллаат суруга быыстапка муннуга тэриллэн тэрээһин ис хоһоонун байытта.
Тэрээһиҥҥэ кэлбит оҕолорго оҕо бибилэтиэкэтин үлэһиттэрэ авиация историятыттан уонна буойун суруйааччылар тустарынан кэпсээтилэр. Сэрии сылларыгар авиация тиэмэтэ олус интэриэһинэй историялааҕын оҕолор сөҕө-махтайа, умсугуйан иһиттилэр. Ону тэҥэ оҕолор «Геройдар суолларынан» квиз оонньууга кытыннылар, «Кыайыы күнүнэн!» диэн «Умсулҕан» коллекционердара ыыппыт маастар кылаастарыгар кыттан открытка оҥордулар, эһэлэригэр-эбэлэригэр, байыаннай дьайыы кыттыылаахтарыгар сурук суруйдулар уонна «Кыайыы 80 сылынан» фотозоналарга хаартыскаҕа түстүлэр.
Ити курдук бу тэрээһинтэн оҕолор Аҕа дойду Улуу сэриитин туһунан элбэҕи билэн, Кыайыы хайдах кэлбитин туһунан дириҥ өйдөбүлү ылан, сэргэхсийэн, бибилэтиэкэ үлэһиттэригэр махтанан тарҕастылар.
Мария АРГУНОВА