Орто Эбэ коррекционнай оскуолатыгар Психологическай доруобуйа ыйынньыгын чэрчитинэн “Өрөгөй түгэн” (Минута славы) диэн талааннары көрүү куонкуруһа бэрт тэрээһиннээхтик ааста.
Ыйынньык оҕо ис уйулҕатын, олоҕу көрүүтүн, тус туругун бөҕөргөтөр сыаллаах ыытыллар. Онуоха бу куонкурус улахан суолталаах. Тэрээһин кэккэ блэмнэниини эрэйэр буолан, уустуктары туоруурга, бэйэҕэ эрэли күүһүрдэргэ, ис холку туругу тутарга көмөлөөх. Куонкурус сүрүн соруга — хас биирдии оҕоҕо ис кыаҕын арыйарыгар, талаанын нөҥүө бэйэтин сыаннаһын ылынарыгар уонна өйдүүрүгэр көмөлөһүү. Ону тэҥэ кэлэктиипкэ олохсуйар сыһыаны бөҕөргөтүүгэ уонна эрэли үөскэтиигэ туһуланар.
Куонкурус үтүө, амарах сыһыаҥҥа ыытылынна. Кыттааччылар салайааччыларын кытта инсценировка, муоданы көрдөрүү, хоһоону ааҕыы, музыкальнай инструмеҥҥа оонньооһун, онтон да атын айар дьоҕуру көрдөрөр кылгас нүөмэри бэлэмнээбиттэр. Нүөмэр ис сүрэхтэн бэлэмнэммитэ, кыттааччы ис кыаҕын көрдөрөр, таһаарар баҕата, сэҥээриини ылара сыаналанна. Күөн күрэскэ араас саастаах оҕолор кытыннылар.
Үөрүөх иһин, хас биирдии кыттааччы бу түгэни суолталаан, сүрэҕин сылааһын, кыһамньытын, дьоҕурун барытын туһанан кытынна. Кинилэр дьон-сэргэ суолталыыр, таптыыр дьоно буолалларын билинэллэрэ, ылыналлара сирэйдэриттэн-харахтарыттан, тутталларыттан-хапталларыттан көстөр.
Саалаҕа мустубут учууталлар, иитээччилэр, оҕолор ытыстарын тыаһынан кыттааччылар эрэллээхтик сананалларыгар, сыанаҕа дьоһуннук тахсалларыгар күүс-көмө буоллулар.
Тэрээһин оҕо ис туругун сайыннарыыга, бэйэтин ис дьиҥин ылыныытыгар улахан кыымы сахта. Ол тыына кэлэктиип биир сорҕото буоларыгар эрэли иҥэрдэ. Биллэрин курдук, киһи айар дьоҕура ис турук көрсөр уустуктарын туоруурга, бэйэҕэ, тулалыыр эйгэҕэ тапталынан сыһыаннаһарга олус көмөлөөх.
Куонкурус түмүгэ маннык буолла:
Кыра бөлөххө бастакы миэстэни “Курочка Ряба” диэн туруоруунан 3-4 кылаас оҕолорун бөлөҕө (сал. О.П. Тихонова) ылла.
“Джентльмен” диэн үҥкүүтүнэн Эрчим Лугинов (сал. А.Н. Гуляева) иккис миэстэҕэ таҕыста.
Үһүс миэстэҕэ “Дэлэндэ” диэн хотугу үҥкүүлээх, муода көрдөрүүлээх нүөмэринэн 2-3 кылаас үөрэнээччилэрин бөлөҕө (сал. Т.П. Охлопкова, Д.П. Сивцева) тигистилэр.
Орто бөлөххө “Прекрасное далеко” диэн ырыа матыыбын синтезаторга оонньоон (сал. Н.В. Тимофеева), Ярослав Турантаев бастакы миэстэни ылла.
Иккис миэстэҕэ “Бременские музыканты” ырыанан 5-с кылаас оҕолорун бөлөҕө (сал. Я.И. Терентьева) таҕыста.
Үһүскэ “Белая береза” диэн хоһоону ааҕан, Арылхан Сысолятин (сал. Д.Д. Гоголев) тигистэ.
Улахан бөлөххө “Мин сахабын” диэн Джида рэп-ырыатын ыллаан, Тимофей Турантаев (сал. А.П. Олесова) тэҥнээҕин булбата.
Виолетта Попова уонна Таня Протодьяконова “Умай, умай” диэн үҥкүүнэн (сал. А.М. Громова) иккис миэстэни ыллылар.
Үһүс миэстэҕэ “Волшебные мастера” диэн фокусниктар бөлөхтөрө (сал. Л.Д. Гоголева) таҕыста. Бары кыайыылаахтарга уонна кыттааччыларга дипломнар уонна бириистэр туттарылыннылар.
Дьуруйаана Находкина, Диана Решетникова. Хаар үҥкүүтэ
Кэнсиэри Виталий Турантаев уонна Анна Васильевна Артамонова иилээн-саҕалаан ыыттылар.
“Өрөгөй түгэн” куонкурус оҕо ис эйгэтигэр ускуустуба уонна чугас дьон өйөбүлэ хайдах курдук суолталааҕын тоһоҕолуур. Инникитин да маннык тэрээһиннэр ыытылла, оҕолорбутун кэрэҕэ, сырдыкка угуйа, бэйэҕэ эрэли, тапталы күүһүрдэ турдунар!
Анна Васильевна АРТАМОНОВА,
Орто Эбэ оскуолатын дириэктэри иитэр үлэҕэ солбуйааччы