Бэйдиҥэҕэ Аҕа сылынан Александра Саввина көҕүлээһининэн уол оҕо, эр киһи үҥкүүлүүрүн элбэтэр сыаллаах «Үҥкүүлээ, уол оҕо, үҥкүүлээ, эр хоһуун» улуустааҕы күрэс олус тэрээһиннээхтик буолан ааста. Өлтөх нэһилиэгин баһылыга Константин Алексеев, солбуйааччыта Ирина Местникова олус кыһаллан туран, бириис олохтоон, спонсор бөҕөтүн булан тэрийэн, улууспутугар үҥкүү искусствотын сайыннарыыга дьоһун кылааттарын киллэрсибиттэрэ кэрэхсэбиллээх. Бу күрэс үгэс буолан салгыы ыытыллара буоллар диэн баҕа санаабын этэбин.
Күрэскэ барыта 156 уол оҕо кыттааччы, 8 биирдиилээн уонна икки буолан толорооччулар, 13 үҥкүү коллектива кытыннылар. Кылаан бирииһи Платон Стрекаловскай салайааччылаах «Уоланнар» үҥкүү бөлөҕө (Мүрүтээҕи уолаттар гимназиялара) ылан 15000 солкуобайынан бириэмийэлэннилэр. 1-кы үрдэли уонна «Көрөөччөлэр биһирэбиллэрин» 69 саастаах саамай аҕа кыттааччы Спиридон Алексеев (Өлтөх нэһилиэгэ) узбектыы үҥкүүнү толорон ылла.
Улууспутугар үҥкүү искусствотын сайыннарыыга Өлтөх нэһилиэгэ дьоһун кылаатын киллэрсэрин бэлиэтиэхпин баҕарабын. Ол курдук өр кэмҥэ культура эйгэтигэр таһаарыылаахтык үлэлии сылдьар Александра Саввина тэрийбит «Эр Модун» үҥкүү ансаамбыла өрөспүүбүлүкэҕэ улууспутун элбэхтик ааттатта, кэнэҕэски көлүөнэ ыччакка холобур буолар. Онон, мин санаабар, эдэр хореограф Людмила Ивановна Александра Афанасьевна үлэтин салҕаан, уолаттар ансаамбылларын тэрийэрэ буоллар үлэ ситимэ салҕаныа этэ. Александра Афанасьевна авторскай бырайыагынан ыытар «Кустук оһуор ойуута» биирдиилээн уонна аҕыйах ахсааннаах толорооччуларга үҥкүү күрэһэ уонна быйыл Аҕа сылынан уолаттарга, эр дьоҥҥо анаммыт күрэһи тэрийбитэ олус кэрэхсэбиллээх.
Уол оҕо, эр дьон үҥкүүлүүрүн элбэтэр сыаллаах холобурдары аҕаллахха, аан дойдуга биллэр киноактёр Жан-Клод ван Дам оҕо эрдэҕиттэн үҥкүүнэн, балетынан дьарыктаммыт, кини: «Үҥкүү, балет дьарыгын тулуйбут киһи хайа баҕарар спорт көрүҥүн кыайыан, спорка ситиһиилэниэн сөп», – диир. Оттон биһиэхэ Саха сиригэр биллэр-көстөр «Кыталык» үҥкүү ансаамбылын төрүттээччи, хореограф, республикаҕа уолаттарга «Сүр Көтөҕүү» бырайыак автора Василий Винокуров: «Былыр-былыргыттан ханнык баҕарар норуот кыргыһыыга киириэн иннинэ да буоллун, үөрүүгэ-хомолтоҕо да буоллун, төрүт хамсаныылардаах буолар, ол хамсаныыларын билиэхтээх, сатыахтаах. Холобур, Кавказ омуктара бары лезгинкаларын кыра оҕотуттан саҕалаан аҕа саастаахтарыгар тиийэ хайдахтаах курдук үҥкүүлүүллэрий? Биһиги тустууктарбыт кавказтары өссө улаханнык кыайа иликтэр. Ити омуктар аан бастаан төрүт хамсаныыларын сатаатахтарына эрэ улахан спортсмен буолаллар. Онон кинилэр лезгинкаларын хамсаналларын курдук, саха уола, эр киһитэ барыта төрүт хамсаныыларын сатыыллара буоллар, ханнык баҕарар спорт көрүҥэр ситиһии кэлиэ этэ», – диэн этэр.
Саха норуота саамай сөбүлүүр «Дыгын оонньууларыгар» кыттар уолаттар үксүлэрэ оҕо сылдьан үҥкүүнэн дьарыктаммыт уолаттар. Алексей Уваровскай оҕо эрдэҕиттэн Кэбээйи Мастааҕар аҕатын үҥкүү ансаамбылыгар дьарыктаммыта, Николай Матаннанов – Таатта «Дружба» ансаамбылыгар, Николай Обоев эмиэ Ньурбаҕа дьарыктаммыт. Онон саха уолаттара бары оҕо эрдэхтэринэ үҥкүүнэн дьарыктаннахтарына, спорка элбэҕи ситиһиэхтэрин сөп дии саныыбын.
Бэйдиҥэҕэ күрэскэ кытта кэлбит уолаттары хайгыахпын баҕарабын: үҥкүүгүтүн бырахпакка, дьаныардаахтык дьарыктаныҥ, оччоҕо олоххутугар элбэҕи ситиһиэххит.
Тэрийээччилэргэ улуус хореографтарын ассоциацияларын аатыттан барҕа махталбытын тиэрдэбит.
Ульяна Ноговицына, хореографтар ассоциациялын салайааччыта