Бээрийэ нэһилиэгин олохтоохторо саас-күһүн суол хаайтарыытыгар үгүс эрэйи көрсөллөр. Ол иһин хаайтарыы кэмигэр кыһалҕаларын быһаарар күүстээх, ханнык да мэһэйтэн иҥнибэт вездеход техниканы 10-ча сылы быһа туруорсубуттара.
Бу баҕа санаалара быйыл туолан үөрүүлэрэ үрдээтэ. Ол курдук биир дойдулаахпыт Валерий Шадрин тэрилтэтэ оҥорон таһаарбыт «Рысь» техниканы бэҕэһээ Бээрийэҕэ тиэртилэр.
Олохтоохтор култуура киинигэр түмсэн, саҥа техника кэлиитин күнү быһа кэтэспиттэр. Суол туруга мөлтөх буолан, вездеходу тиэйбит массыына киэһэ 21:00 эрэ чааска тиийдэ. Төһө даҕаны бириэмэ ырааттар, оҕолуун-уруулуун, аҕам саастаахтыын кэтэһиилээх саҥа техникаларын өрө көтөҕүллэн уруйдуу көрүстүлэр.
Улуус баһылыга Василий Алексеев Бээрийэ нэһилиэгин баһылыгар Петр Васильевка «Рысь» вездеход күлүүһүн дохсун ытыс тыаһын ортотугар туттарда. Василий Петрович бэлиэтээбитинэн, тыа сирин олоҕун тупсарыы, ыраах сытар нэһилиэктэр суолга-иискэ кыһалҕаларын быһаарыы улуус дьаһалтатын биир сүрүн соруга буолар.
Өр сылларга ыра санаа оҥостубут баҕа санаалара туолбутунан Бээрийэ олохтоохторо улуус дьаһалтатыгар уонна баһылыкка истиҥ махталларын тиэртилэр.
Улуус дьаһалтатын пресс-сулууспата