Олохтоохтор уонна нэһилиэк дьаһалтата бэлиэ күнү үрдүк таһымнаахтык ыытарга бэлэмнэнии үлэтин саҕалаабыттара ыраатта.
Ол курдук сылын ахсын саас-күһүн айан суолугар мэһэйдэри үөскэтэр, олохтоохтору атахтыыр Таппаҕа үрэҕин туоратар муостаны саҥардан, урукку мас муоста оннугар билигин тимир конструкциянан бөҕө-таҕа гына тутулла турар. Үлэ бүтэһик түһүмэххэ тиийбит.
Хаарбах дьиэттэн көһөрүү бырагырааматынан түөрт квартиралаах саҥа уопсай дьиэ тутуллуохтаах. Суолга хаайтарыы тахсыан иннинэ тутууга ирдэнэр матырыйаал барыта толору таһаҕастанан тиийдэ. Тутуу үлэтэ сотору кэминэн саҕаланыаҕа.
Олохтоох көҕүлээһиннэрин өйүүр бырагыраамманан (ППМИ) нэһилиэк ыһыахтыыр сирин саҥардыы үлэтэ ыытыллар. Онон үбүлүөйдээх ыһыахха саҥа түһүлгэ киэркэйэн, бары тутуулар, тупсарыы үлэлэрэ этэҥҥэ түмүктэнэн, бөһүөлэк көстүүтэ ситэн-хотон ыалдьыттары көрсүөхтэрэ.
Улуус дьаһалтатын пресс-сулууспата