Уус Алдан улууһун култуураҕа салалтата уонна Бороҕоннооҕу оҕо ускуустуба оскуолата төрөппүттэр уонна оҕолор ортолоругар «Мы мечтаем побывать» уруһуй күрэһин сэтинньи 1 күнүгэр тэрийэн ыыттыбыт. Күрэскэ барыта алта оскуолаттан 22 киһи кытынна.
Бу күрэс Россияҕа Дьиэ кэргэн сылынан, республикабытыгар Оҕо сылынан уонна бастакы бэрэсидьиэммит Михаил Николаев төрүттээбит «Бары уруһуйдуубут» бырайыагынан ыытыллар марафон чэрчитинэн, улууспутугар бырайыак бэлиэтэ кэлбитигэр ананна. Оҕо төрөппүтүнээн бииргэ баҕа санааларын толкуйдаан, айар дьоҕурдарын, уруһуйдуур сатабылларын холбоон, олус үчүгэй уруһуйдары оҥорон таһаардылар. Манна кыттыбыт төрөппүттэрбит оҕолорун өйөөн, күрэскэ кытта кэлбиттэрэ кэрэхсэбиллээх.
Күрэс түмүгүнэн 9-10 саастаах оҕолорго 1-кы миэстэни Лөгөй орто оскуолатыттан Эрсан, Аграфена Кычкиннар, 2-с миэстэни Орто Эбэ оскуолатыттан Сандаара, Нарыйа Тимофеевалар, 3-с миэстэни Бороҕоннооҕу ускуустуба оскуолата Милена, Анна Старостиналар ыллылар. Оттон 11-12 саастаах оҕолорго Найахы орто оскуолатыттан 1-кы миэстэҕэ Айсан, Екатерина Ксенофонтовтар, 2-с миэстэҕэ Лөгөй орто оскуолатыттан Ньургуйаана, Ия Переваловалар, 3-с миэстэҕэ Мындаабатааҕы уруһуй кылааһыттан Надя, Доминика Егоровалар тигистилэр.13-14 саастаах оҕолорго 1-кы миэстэни Чараҥ орто оскуолатыттан Айна, Саргылана Крыловалар, 2-с миэстэни Тумул орто оскуолатыттан Айсена Стручкова, Лена Алексеева ылары ситистилэр.
Кыттааччылар бары сыаналаах бириистэринэн, дипломнарынан, махтал суруктарынан бэлиэтэннилэр.
Розалия Сыроватская, Бороҕоннооҕу оҕо ускуустуба оскуолатын уруһуй салаатын учуутала