Мин ааспыт 2025 сыл сэтинньи ыйыттан улуус дьаһалтатын иһинэн анал байыаннай дьайыыга кытта сылдьар буойуттар уонна кинилэр дьиэ кэргэттэрин кытта үлэлэһэр исписэлииһинэн ананан үлэбин саҕалаабытым. Бу сүрдээх киэҥ хабааннаах үлэ буолар.
Үлэбин улууспут дьоно-сэргэтэ, биир дойдулаахтарбыт, волонтердарбыт бары түмсэн, биир санааҕа киирэн буойуттарбыт тустарыгар хомуйбут, бэлэмнээбит гуманитарнай көмөлөрүн бэлэмнээһинтэн саҕалаабытым. Ахсынньыга улууспут баһылыга В.П. Алексеев салайааччылаах делегация анал байыаннай дьайыы бара турар сиригэр баран үлэлээн кэлбитэ. Онно тиийэн буойуттарбытын көрсөн, тус кыһалҕаларын быһаарсан, дьоммут-сэргэбит хомуйбут астарын-үөллэрин, араас малларын, волонтердарбыт тикпит таҥастарын, хаххалыыр сеткаларын, анал тэриллэри уонна техникалары тиксэрдилэр. Барыта 80-тан тахса биир дойдулаахпытын көрүстүлэр.
Тохсунньуга анал байыаннай дьайыыга кытта сылдьар буойуттарбыт дьиэ кэргэттэригэр анаан кэккэ кыһалҕалаах боппуруостарын быһаарсыыга аналлаах аһаҕас кэпсэтии ыытыллыбыта. Манна 8 туһааннаах тэрилтэ үлэһиттэрэ кэлэн, кинилэр өттүлэриттэн туох көмө баарын быһааран биэрбиттэрэ, сиһилии билиһиннэрбиттэрэ. Бу кэпсэтиигэ барыта 48 киһи кэлэн кыттан, араас ыйытыыларыгар хоруйдары ылбыттара.
Кулун тутарга Аҕа дойдуну көмүскээччилэр дьиэ кэргэттэрин Саха сиринээҕи кэмитиэтэ «Правомобиль» аахсыйанан кэлэн үлэлээбитэ. Манна араас хайысхалартан туһааннаах исписэлиистэр кэлэннэр, юридическай, психологическай көмөлөрү оҥордулар. Анал байыаннай дьайыы кыттыылаахтара уонна кинилэр дьиэ кэргэттэрэ кыттыбыттара.
Анал байыаннай дьайыы кыттыылаахтарыгар уонна кинилэр дьиэ кэргэттэригэр анаан араас хабааннаах көмөлөр сылын аайы элбии тураллар. Маны сырдатыы, быһаарыы, көмөлөрү кэмигэр туһаналларын ситиһэр сыаллаах үлэлэр, консультациялар ыытылла туруохтара, социальнай ситимнэринэн информационнай сырдатыы тарҕаныаҕа.
Анал байыаннай дьайыы кыттыылаахтарыгар анаан туһуланар үлэни Уус Алдан уонна Мэҥэ Хаҥалас холбоһуктаах байыаннай комиссариатын кытары биир ситимнээхтик ыытабыт. Ол курдук «Аҕа дойдуну көмүскээччилэр» фонда улуустааҕы салаатын үлэһиттэрин кытары федеральнай уонна эрэгийиэннээҕи төлөбүрдэр, бойобуой наҕараадалар кэлиилэригэр үлэ күүскэ барар.
Анал байыаннай дьайыы кыттыылаахтарыгар уонна кинилэр дьиэ кэргэттэригэр анаан араас көмөлөр бааллар. Холобур, байыаннай дьайыыга кыттан кэлбит бэтэрээннэргэ анаан быйылгыттан социальнай хантараак бэриллэр буолла. Билиҥҥи туругунан, биир бэтэрээн оннук көмөнү ылан, автосервис тэринэн үлэтин саҕалыаҕа. Ону тэҥэ тыа хаһаайыстыбатын министиэристибэтэ «Агромотиватор» диэн бырагырааманы үлэлэтэн эрэр. Аны күһүн бу куонкуруска анал байыаннай дьайыы икки бэтэрээнэ кыттаары бэлэмнэнэллэр. Эмтэнэ, сынньана араас санаторийдарга барыахтарын, оҕолорун лааҕырдарга ыытыахтарын сөп. Итини тэҥэ манна, Бороҕоҥҥо, кинилэргэ уонна кинилэр дьиэ кэргэттэригэр, урукку сыллардааҕы байыаннай дьайыылар кыттыылаахтарыгар анаан чэбдигирдэр киин арылынна. Манна массаж араас көрүҥүн ылан эттэрин-сииннэрин чэбдигирдиэхтэрэ. Ону тэҥэ «Олоҥхо» дьиэтигэр кэлэн сахалыы сиэринэн алгыс ылыахтара уонна ыраастаныахтара. Бу уоппускаҕа кэлбит буойуттарбытыгар олус туһалаах буолуоҕа.
Анал байыаннай дьайыы кыттыылаахтарыгар уонна кинилэр дьиэ кэргэттэригэр анаан араас тэрээһиннэр ыытыллаллар. Ол курдук волонтердар күннэрин бэлиэтээбиппит, араас наҕараадалары туттарбыппыт, оҕолорго анаан саҥа дьыллааҕы утренниктар, Аҕа дойдуну көмүскээччилэр күннэригэр анаан араас хабааннаах тэрээһиннэр ыытыллыбыттара. Сэрии толоонугар олохторун толук уурбут дьоруой буойуттарбыт ааттарын үйэтитэр сыаллаах сылын аайы араас спортивнай күрэхтэһиилэр ыытыллаллар.
Нэһилиэктэргэ анал байыаннай дьайыы кыттыылаахтарыгар уонна кинилэр дьиэ кэргэттэригэр анаан араас хабааннаах субуотунньуктар тэриллэн ыытылла тураллар. Сүрүннээн, оттук мас бэлэмнээһинигэр, муус ылыытыгар үлэлэһэлэр.
Анал байыаннай дьайыы уонна араас сыллардааҕы байыаннай дьайыылар кыттыылаахтарыгар анаан Бороҕоҥҥо сквер тутуута былааннанар. Билигин бырайыактыыр үлэтэ бара турар.
Биһиги улууспутугар волонтердарбыт хас нэһилиэк аайы күүскэ үлэлии олороллор, буойуттарбытыгар таҥас-сап, хаххалыыр сеткалары, антидроновай комплектары, араас туттуллар маллары бэлэмнээһин сылы быһа тохтоло суох ыытылла турар. Бу бары түмсүүлээхпитин, уолаттарбыт этэҥҥэ сылдьалларын туһугар кыһамньыбытын көрдөрөр.
Муус устарга улууспут баһылыгын солбуйааччы Г.Ф. Аргунов салайааччылаах делегация анал байыаннай дьайыы бара турар сиригэр тиийэ сырыттыбыт. Онно тиийэн буойуттарбытын көрсөн кыһалҕаларын быһаарсан, дьоммут-сэргэбит хомуйбут астарын-үөллэрин, араас малларын, волонтердарбыт тикпит таҥастарын, хаххалыыр сеткаларын, анал тэриллэри уонна техникалары тиксэрдибит.
Анал байыаннай дьайыыга кытта сылдьар хорсун санаалаах буойуттарбытыгар бары этэҥҥэ сылдьыҥ, кыайыы өрөгөйдөөх дойдугутугар төннөөрүҥ диэн баҕа санаабын, алгыс тылбын этэбин. Тыыл көмөтө быстыбакка бара туруоҕа.
Түгэнинэн туһанан, нэһилиэктэрбит дьаһалталарыгар, бары волонтердарбытыгар, анал байыаннай дьайыы хайысхатыгар үлэлии олорор үлэһиттэрбитигэр, улууспут дьонугар-сэргэтигэр, биир дойдулаахтарбытыгар, буойуттарбыт уонна кинилэр дьиэ кэргэттэрин туһугар үлэлэһэ, көмөлөһө олороргутугар улахан махталбын тиэрдэбин.
Егор ЧЕРКАШИН, улуус дьаһалтатын иһинэн анал байыаннай дьайыыга кытта сылдьар буойуттар уонна кинилэр дьиэ кэргэттэрин кытта үлэлэһэр исписэлиис