Байыаннай дьайыы кыттыылаахтарыгар санааны бөҕөргөтөр, көмө, өйөбүл буолар үтүө санаа тула улууспут дьоно-сэргэтэ сомоҕолоһоллорун күннэтэ көрөбүт.
Улуустааҕы «Помощь волонтера бесценна» ыстаап көҕүлээһининэн бу күннэргэ иис үлэтэ тиһиктээхтик ыытылла турар. Ол курдук бэҕэһээ Өнөр нэһилиэгэр уйулҕа киинин улуустааҕы салаатын исписэлииһэ Таисия Базарова тиийэн иистэнэр массыыналарын көрөн-истэн, флис көстүүмү хайдах тигиллэрин быһааран биэрдэ. Баатаҕайга кыһыҥҥы хаххаланар сиэккэлэри өрөн саҕалаатылар уонна иистэрин салгыыллар. Уһун -күөлгэ эмиэ ииһи саҕалаатылар.
Оттон бүгүн улуустааҕы кииннэммит бибилэтиэкэ кэлэктиибэ ыстаапка кэлэн иискэ көмөлөстүлэр. Итиэннэ, тумуллар көмөлөһөргө бэлэмнэрин биллэрэн иискэ матырыйаалы, нэмиэти ыллардылар.
Ону тэҥэ биирдиилэн дьон ис сүрэхтэн уунар көмөтө эмиэ бэлиэтэнэр. Ол курдук байыаннай дьайыыга кытта сылдьар байыас ийэтэ, үһүс сылын тэҥҥэ волонтердаһа сылдьар Наталья Борисова бэйэтин илиитин сылааһынан оҥорбут, арчылыырга, ыраастыырга туттуллар балаҕаны бэлэх уунна, “уолаттар кэллэхтэринэ буруо таһааран ыраастаарыҥ”, – диэн баҕа санаатын эттэ. Ону таһынан ыстаап үлэһиттэрэ, Чебурашка байыаннай дьайыыга тулуурдаах, дьулуурдаах уонна үтүө санаа символа буолбутунан Чебурашка оонньууру тигиигэ аахсыйа биллэрбиттэрин көҕүлээн, Мүрү 2-с №-дээх орто оскуолатын 6-с кылааһын үөрэнээччитэ Эвелина Никитина тигэн, байыаннай дьайыы байыастарыгар ыытарга бэлэх уунна. Бу туһунан ыстаап салайааччыта Саргылаана Никитина иһитиннэрдэ.
Мария АРГУНОВА.