Сокуоннай саастарын ситэ илик оҕолору чөлүгэр түһэрэр Уус Алданнааҕы кииҥҥэ Арассыыйаҕа Дьиэ кэргэн, Саха сиригэр Оҕо саас, Уус Алдаҥҥа Аҕа сылларынан сибээстээн «Аҕа алгыһынан, Ийэ иэйиитинэн» бырайыак иһинэн Байанай ыйын чэрчитинэн «Уол оҕо – аҕа эрэлэ» диэн тэрээһин үрдүк таһымҥа буолан ааста.
Ол курдук уолаттар уонна аҕалар сэтинньи 14 күнүгэр Сэһэн Ардьакыап улуустааҕы түмэлгэ Байанай ыйыгар ананан турбут быыстапканы олус сэҥээрэн көрдүлэр, онтон Н.Н. Тарскай аатынан спорт киинигэр Мүрүтээҕи юннаттар станцияларын иһинэн үдэлиир «Булчут кутаата» куруһуок салайааччыта Валерий Бурцев айылҕаҕа сылдьыы сиэрин-туомун билиһиннэрбитин сэргээтилэр. Салгыы кини 4 түһүмэхтэн турар өй, толкуй, түргэн туттуу ирдэнэр бэрт сэргэх оонньуулары оонньотто. Үс түһүмэҕинэн бэргэн ытыы, саамай сымса, байанайдаах балыксыт көрүҥнэргэ сытыы киирсиилэр буоллулар.
Уопсай түмүккэ Сыырдаахтан 7 уол оҕолоох Валерий Олесов уолунаан Валералыын кыайыы өрөгөйүн билэн, биһиги тэрилтэбитигэр өрүү күүс-көмө буолар попечительбыт Ил Түмэн депутата Геннадий Васильев туруорбут бирииһин – саха быһаҕын – ылан уөрдүлэр-көттүлэр. Иккис миэстэни Александр Сивцев уолунаан Мишалыын ылары ситистилэр, үһүс миэстэни Петр Иванов уолунаан Дуоланныын ыллылар.
«Мин – айылҕа оҕотобун» хаартыска кэтэхтэн күрэһигэр айылҕаҕа дьиэ кэргэнинэн, доҕотторунаан балыктыы, оттуу, сир астыы сылдьар араас хаартыскалар киирдилэр. Бу тэрээһин төрөппүттэргэ, оҕолорго саха итэҕэлин, үгэстэрин нөҥүө дьиэ кэргэҥҥэ истиҥ сыһыаны, тапталы үөскэтэргэ уонна үлэҕэ үөрүйэхтэри иҥэрэргэ үлэлэһэр соруктаах.
Лиана Иннокентьева, социальнай педагог