Баатаҕай нэһилиэгэр орто оскуола иһинэн үлэлиир Н.Н. Тарскай аатынан «Спорт Албан аата» түмэл төрүттэммитэ 30 сылын алтынньы 10 күнүгэр бэлиэтээтибит. Түмэли 1996 с. энтузиаст, педагогическай үлэ ветерана Ксения Румянцева төрүттээбитэ. Ол иннинэ оскуолаҕа кыраайы үөрэтэр муннук үлэлээбитэ, салайааччынан историк учуутал Петр Ушницкай анаммыта.
«Түмэл – олох кэрэһитэ» тэрээһиҥҥэ ыраахтан-чугастан үгүс киһи кытынна. Түмэл историятын үтүө кэрчиктэрин үллэстэр, үйэтитэр уонна инники кэскили түстэһэр күн экскурсияттан саҕаланна. Саха балаҕаныгар аал уоту оттон, Николай Тарскай Чараҥай оскуолатыгар үлэлиир кэмигэр оҥотторбут спортивнай былаһааккатын макетын экспонат быһыытынан арыйдыбыт, ол кэнниттэн икки куорпуһунан нэһилиэк историятын, дьонун-сэргэтин, үлэтин-хамнаһын билиһиннэрэр, сир тиэхиньикэтин павильонугар экскурсияларга сырыттыбыт.
Тэрээһин үөрүүлээх чааһа Баатаҕай оскуолатын Өрөгөй ырыатынан саҕаланна. Спортсаала иһэ толору нэһилиэк спортивнай олоҕун кэпсиир быыстапканан киэргэммитэ дьон биһирэбилин ылла. Кэлбит ыалдьыттар истиҥ эҕэрдэлэрин, оскуола кэлэктиибэ бэлэмнээбит эҕэрдэ кэнсиэрдэрин кэрэхсии көрдүбүт. Үөрүүлээх чаас кэнниттэн сандалы остуол тула олорон сэһэргэһэн, үҥкүүлээн, оһуохайдаан, санаа атастаһан тарҕастыбыт.
Үбүлүөйү тэрийбит Баатаҕай орто оскуолатын кэлэктиибигэр, директор, түмэл салайааччыта Алеанна Бурнашеваҕа бука бары ыалдьыттар ааттарыттан истиҥ махталбытын тиэрдэбит! Түмэлбит инникитин да үйэлээҕи түстүү, сайда-чэчирии турдун!
Августина Пермякова, библиотекарь