Аныгы үйэ киһи туругун улаханнык сатарытта. Өйүн-санаатын, кутун-сүрүн ыста. Тулабытыгар буола турар, күннэтэ көрсөр эйгэбит сатарыйыыта хас биирдии киһиэхэ, дьиэ кэргэҥҥэ билиннэ… Онон улууспутугар, дьоммутугар-сэргэбитигэр туох көмөнү, сырдыгы сайабыт диэн ыйытыы хас биирдии киһиттэн, түмсүүттэн үөскүөхтээх.
Саҥа үүммүт сэтинньи ый бастакы күнүгэр улууспутугар Олоҥхо дьиэтин туонатыгар айыы сыдьаайдаах истиҥ, арчылыыр алгыстаах тэрээһин буолла. Бу тэрээһини саҥа тэриллибит «Сырдык эйгэ» общественнай түмсүү иилээн-саҕалаан ыытта, онуоха Олоҥхо дьиэтэ, культура управлениета, оҕо, дьиэ кэргэн комитетын салаата өйөөтүлэр. Дьоммутугар-сэргэбитигэр санааларын көтөҕөр, куттарын ыраастыыр үтүөкэн тэрээһин сүрүн сыала-соруга улууспутугар итэҕэл, сиэр-туом түмсүүтүн олохтуурга туһуланна.
Саҥа кэм модьоҕотугар өй-санаа аймалҕаныгар ылларан эрэрбитин өйдүөх тустаахпыт. Ол иһин биһиэхэ сүбэ-ама буола ыаллыы сытар улууспутуттан айыы итэҕэлин, сиэрин-туомун үөрэтэр «Сырдык айыы сыдьаайа» түмсүү сүрүн общественниктара – алгысчыт Зиновий Игнатьев, «Ийэ тыл» түмсүү салайааччыта Евдокия Решетникова, киһи майгы-сигили, удьуор ситимин сэһэргиир ытык кырдьаҕас Анна Климентова уонна сахалыы эмчит Ил Иитэ Күн Сыралыма дорҕоон, тыыныы, кыыс оҕо, дьахтар аналын туһунан сырдаттылар. Онуоха сэһэргэһии, кэпсэтии олус дириҥ хайысханы таарыйан, дьоммут-сэргэбит «утаппыттыы» иһиттилэр.
Майаҕа «Сырдык айыы сыдьаайа» сиэр-туом, итэҕэл киинин үлэлэтэр ыалдьыт дьоммут бүгүҥҥү күҥҥэ туһааннаах, олус наадыйар эйгэбитин арыйан, сиһилии итэҕэл олохтоноро, туттуллара наадатын кэпсээтилэр, сүбэлээтилэр. Ол курдук бу киэһэ алгыс, арчылааһын хайдах үлэлиирин, тоҕо оҥоһулларын иһиттибит, көрдүбүт. Иһиттибит иччилээх төрөөбүт тылбыт күүһэ симэлийэр кутталлааҕын, өскөтүн кэлиҥҥи кэм ыччатын, оҕолорбутун, сиэннэрбитин сахалыы толкуйдаппат, саҥардыбат буоллахпытына. Иһиттибит удьуор ситимэ өбүгэ күүһүн биэрэрин, онон ийэбит, аҕабыт хааннарын ситимнииргэ, онон бэйэбит бөҕөргүүр кистэлэҥин, ону сэргэ иһиттибит эр дьоммутун инники күөҥҥэ, өрө тутан илдьэ сырыттахпытына дьахтар дьоло, ыал тыына, күүһэ онно сытарын.
Дьэ, бу кэпсэтиилэр барыта бүгүҥҥү олохпутугар олус наадалаахтар, бэҕэһээҥҥи тэрээһиҥҥэ улуус 80-ча олохтооҕо иһиттэ, алгыс ылла, ыраастанна. Ити мээнэҕэ буолбат, ол аата уһуктар, кыттыһар, тыынныыр кэм кэлбит бэлиэтэ көстөр. Биһиги, сахалар, бары киэн туттар улахан өбүгэлээх дьоммут, ону аанньа ахтыбат буолар сатаммат, бу күнтэн болҕомтоҕо ылан, күннээҕи эйгэбитигэр киллэрэр, туһанар тосхол күүтэр. Киһи олоҕо кылгас. Туох барыта тэҥнээтэххэ, холбуу, сыһыары туттахха ордук өйдөнөр. Онон бу тэрээһиҥҥэ тус бэйэтинэн кэлэн истибитинэн, сэҥээрбитинэн кыттыспыт улууспут олохтооҕо олус дуоһуйан, ыраастанан, алгыстанан барбыта буолуо диэн тэрийээччилэр үөрэбит. Тус улахан махталбытын улуустааҕы Олоҥхо дьиэтин үлэһиттэригэр, Улуустааҕы Культура управлениятыгар, Улуустааҕы Дьиэ кэргэн, оҕо салаатыгар маннык тэрээһиннэргэ санааларын ууран, кэнэҕэскилээхтэрин өйдөөн көмө оҥорбуттарыгар махтанабыт!
Уонтан тахса сыл үлэлээн, Майа улууһугар итэҕэлбит сырдык сыдьаайын тарҕатар, дьоммут кэлэн дириҥ билиилэрин кэпсээн, санааларын үллэстибиттэригэр махтанабыт!
Улуус, нэһилиэк хас биирдии олохтооҕуттан, хас биирдии общественнай түмсүү санаатыттан, улуус сайдыыта түстэнэр. Хас биирдии саха ааттаах киһи хайдах үлэлээн, хайдах бу дойдуга олорон ааһарыттан, ыччаппыт, аймах дьоммут олохторо тутулуктанарын бигэтик өйдүүр кэм кэллэ. Онон, төрүт итэҕэлбит сиэрин-туомун эргитиэҕиҥ, туттуоҕуҥ, ыччат дьоммутун уһуйуоҕуҥ, арчылыаҕыҥ!
Бээрийэ кыыһа Хотойук Айгыына, суруналыыс, общественник, хоһоонньут