Бүтүн Арассыыйатааҕы акцияҕа кыттыһан, А.Р. Халдеева аатынан нэһилиэк модельнай библиотекатыгар 15-с төгүлүн «Библионочь-2026» тэрээһинэ муус устар 17 күнүгэр ыытылынна.
Тэрээһин 2026 сыл Россияҕа норуоттар сомоҕолоһууларын уонна өрөспүүбүлүкэбитигэр Култуура сылларыгар ананна. Тэрээһиҥҥэ өр сылларга Тумул орто оскуолатыгар улуу нуучча тылыгар уһуйбут РСФСР үөрэҕириитин туйгуна, «СӨ учууталлар Учууталлара», педагогическай үлэ бэтэрээнэ, Бороҕон нэһилиэгин бочуоттаах олохтооҕо Матрена Афанасьевна Новоприезжая «Нуучча тыла, култуурата – мин олохпор» бэсиэдэтин, интернациональнай дьиэ кэргэн далбар хотуна, соҕуруу дойдуттан кэлэн ыал буолан олохсуйбут Татьяна Васильевна Аржакова истиҥ ахтыытын сэргээн иһиттибит.
Тэрээһиҥҥэ «Россия – многонациональная страна» диэн кинигэ быыстапка сырдатылынна, «Путешествие в прошлое «Назад в СССР» квиз-оонньуу, араас омук бүлүүдэлэрин астаан көрдөрүү күрэстэрэ ыытылыннылар.
Тэрээһин кыттыылаахтара бука-бары, араас омуктар национальнай көстүүмнэрин кэтэн тэрээһини киэргэттилэр. Төгүрүк остуол тула санаа атастастылар, байаанн доҕуһуолунан дуоһуйа ыллаатылар. Бары кыттыбыттарга туоһу суруктар, кыайыылаахтарга бэлэхтэр туттарылыннылар.
Светлана Прудецкая, библиотекарь, уопсас. кэрэсп. Тумул