Эдэр кэскиллээх режиссер, актер, стендапер Дьулусхан Андросов аата кэнники сылларга балай да иһиллэр буолла. Кини биһиги биир дойдулаахпыт В.В. Алексеев аатынан Мүрүтээҕи уолаттар гимназияларын 2015 сыллааҕы выпускнига буолар. Гимназияҕа үөрэнэр сылларыгар “Саха Лига” КВН хамсааһыныгар бэйэтин аатын ааттаппыта, айар суолун-ииһин хаалларбыта. Ол курдук Сочига буолбут студеннар лигаларын күрэһэр тиийэ кыттыбыта.
Талааннаах выпускникпыт Хотугулуу-Илиҥҥи федеральнай университеты ситиһиилээхтик бүтэрбитэ. Сахалыы стендап көрүҥүн биир бастакынан эдэр ыччаттарга тарҕата сылдьар, элбэх кэнсиэрдэри тэрийэллэр. Дьулусхан ылсыбыт дьыалатын тиһэҕэр тиэрдэр, ол бырайыагын үрдүк таһымнаахтык ыытар.
“Квартал труда” Сахабыт сирин биллэр ырыаһыттарын мунньан, кэнсиэр туруоран дьон кутун тутан, билигин биир кэтэһиилээх бырайыак буолбута сөхтөрөр. Сахалыы киинэ индустрията сылтан сыл сайдан иһэр. Биһиги Дьулусхаммыт онно бэйэтин сэмэй кылаатын киллэрсэр. Ол курдук элбэх көрөөччү биһирэбилин ылбыт “Триумф” киинэ биир сүрүн оруолун Олимпиада үрүҥ көмүс призерун Александр Иванов оруолун итэҕэтиилээхтик оонньообута.
Билигин бэйэтэ «Абааһылаах хаус» диэн киинэни устубута киинэ тыйаатырдарыгар көрдөрүллүбүтэ. Быйылгы сылга биир улахан бырайыагынан, эдэр ыччат кыһалҕатын таарыйар, дьиҥ олоххо буолбут социальнай хабааннаах ис хоһоонноох «Айхал» диэн киинэни устуута буолар. Бу киинэҕэ оскуола оҕолоро уһуллубуттара киинэни өссө сытыырхатар. Инники олохторугар бэйэлэрин суолларын көрдүүр эдэр дьоҥҥо иитэр-үөрэтэр суолталаах киинэ буолуо диэн бүк эрэнэбит. Саҥа киинэ алтынньыга өрөспүүбүлүкэбит бары киинэ тыйаатырдарыгар көстүөхтээх.
Онон улууспут ыччата бэйэлэрин талааннарынан, дьоҕурдарынан өрөспүүбүлүкэбит араас салаалара сайдалларыгар үлэлэһэллэриттэн киэн туттабыт. Үөрэнээччибитигэр Дьулусхаҥҥа айымньылаах үлэтигэр ситиһиилэри баҕарабыт.
Галина Матвеева, “Өркөн” эбии үөрэхтээһин киинин методиһа