Түүлээх нэһилиэгиттэн массыынанан чаас аҥара айаннаан, Алдан өрүс кытылыгар турар «Верхоянский перевоз» диэн гидро-метеостанцияҕа тиийдибит. Бу станция манна 1948 сылтан үлэлиир.
Биһигини станция билиҥҥи үлэһиттэрэ – сааһыра барбыт тоҥ нуучча кэргэнниилэр үөрэ-көтө көрүстүлэр. Гидрометеоролог идэлээх Надежда, Юрий Гордеевтар Новосибирскайтан 2007 сыллаахха кэлэн, станцияҕа олохсуйан олорон үлэлииллэр эбит.
Өрөбүлэ суох, түүннэри-күнүстэри хас үс чаас аайы көрдөрүүлэрин дааннайын Дьокуускайга баар гидрометеорология уонна тулалыыр эйгэни кэтээн көрөр федеральнай тэрилтэҕэ биэрэ олорор буоланнар, станцияларыттан тэйбэттэр. Аҕыйах күнүнэн күүтүүлээх уоппускаларыгар бараары «кынаттарын куурда» сылдьаллар. Надежда таһырдьа тахсаары туран: «Видеоҕа устаҕыт дуо? Түүлээхтэри түһэн биэрбэт курдук үчүгэй соммун кэтиэм», – диэн саҕынньаҕын күлэ-үөрэ кэттэ.
Сэбиэскэй кэм саҕаттан олохтоммут күнү-дьылы кэтээн-көрөр араас эгэлгэ прибордардаах метео былаһааккаларын кэритэ сылдьан кэпсээтилэр. Судургутук эттэххэ, тыалы-кууһу, сир, салгын, уу температуратын, хаар төһө халыҥын, ыйааһынын, уу таһымын, састаабын – барытын мээрэйдээн, көрдөрүүлэрин чопчу чааһыгар түһэрэн иһэллэр.
Эйэҕэс-сайаҕас, үгүс кэпсээннээх кэргэнниилэр Сахабыт сирин кырыы сытар нэһилиэгэр кэлэн олохтоохтору кытта эн-мин дэһэн ыаллаһан, балыктаһан, сир астаһан, сайынын оҕуруот олордон, үс дьиэ оһоҕун оттон, чуҥкуйары билбэккэ олороллор. «Аспытын-үөлбүтүн Дьокуускайтан салайар тэрилтэбит таһар буолан, кыһалҕаны көрсүбэппит», – диэн этэллэр. Кинилэр интэриэһинэй, ураты идэлэрин туһунан «бу – үлэ буолбатах, бу – дууһа туруга» дииллэр.
Мария Аргунова