“Тоҕо хаартыскаҕа түһэрэллэрий?” диэн кыбыстыбыт сиэн кыыс ийэтин кэннигэр саспытынан Ил Дарханныын көрүстэ. Айсен Николаев элбэх оҕолоох, үс улахан уоллара анал байыаннай дьайыыга кыттыбыт Окоемовтар дьиэ кэргэттэригэр ыалдьыттаата.
Саха ыалын сиэринэн итии чэй кутан, Окоемовтар Ил Дарханныын остуолга олорон сэһэргэстилэр. Ыал аҕа баһылыга Анатолий – бочуоттаах сынньалаҥҥа олорор үлэ бэтэрээнэ, Мүрү, Курбуһах нэһилиэктэрин бочуоттаах олохтооҕо, улуус социальнай-экономическай сайдыытыгар кылаатын иһин, килбиэннээх үлэтин иһин бэлиэлэр хаһаайыннара. Кини аан бастаан дьиэ кэргэнин билиһиннэрдэ. Ол курдук Окоемовтар ииппиттэрин кытары сэттэ оҕолоохтор, элбэх сиэннээхтэр, биир хос сиэннээхтэр. Кинилэр дьиэлэриттэн үс уол анал байыаннай дьайыыга кыттыбыт, улаханнара Гаврил Данилов былырыын сэрии хонуутугар тыына быстыбытын Саҥа дьыл иннинэ тиһэх суолугар атаарбыттар. Иккис уол Алексей Окоемов – ИДьМ бэтэрээнэ, полиция капитана. Командировка быһыытынан Луганскайга алта ый сулууспалаан кэлбит. Оттон үһүс уоллара Константин эмиэ уоттаах сэриини ааспыт, билигин ХИФУ физкультура салаатыгар кэтэхтэн үөрэнэ сылдьар, тренер буолар санаалаах эбит. Дьиэ хаһаайката Клара “Мүрүчээнэ” оҕо уһуйааныгар иитээччи көмөлөһөөччүтүнэн үлэлиир.
Сэһэргэһии кэмигэр Айсен Сергеевич Константинтан реабилитация төһө бэркэ ааспытын туоһуласта, мэдиссиинэ, үөрэх эйгэтин таарыйдылар. Кыраларыттан, сэттис кылааска үөрэнэр Коляттан үөрэҕин туоһуласта, уол маладьыас, Арассыыйа араас муннуктарыгар тэриллэр научнай-практическай конференцияларга ситиһиилээхтик кыттар эбит. Рубик кубигын 40 сөкүүндэ иһигэр сааһылыыбын диэн Ил Дарханы сөхтөрдө.
Окоемовтар: «Бу дьиэбитигэр киириэхпититтэн 30-ча сыл тухары оһох оттон кэллибит. Оһохпут да эргэрдэ, бэйэбит да сааһырдыбыт. Киинтэн ититиигэ холбонорбут буоллар», – диэн кииннэммит ититии ситимигэр холбонуу кыһалҕатын көтөхтүлэр.
Үс сыл анараа өттүттэн ыла Мүрү нэһилиэгин дьаһалтата «Маяк» түөлбэҕэ хочуолунай тутан киллэрэргэ үлэлэһэр, олохтоохтор харчы кыттыһан ититии ситимин тардыытын хааччыйбыттара, хочуол бэйэтэ да бэлэм, ол эрээри үлэ салгыы барыаҕын субсидия көрүллүүтүгэр кэлэн иҥнэн турар. Айсен Сергеевич маннык кыһалҕа баарын истибит эбит, бу түөлбэҕэ сэттэ АБДь кыттыылааҕын дьиэ кэргэнэ олорорунан, үгүс үлэ номнуо ыытыллыбытынан, ититии киирэ охсоро оруннааҕын бэлиэтээтэ, бырабыыталыстыбаҕа тиэрдиэм диэн мэктиэлээтэ.
Анатолий Кириллин