Бу күннэргэ Бэрт Ууһун нэһилиэгин олохтоох библиотеката оскуоланы кытта бииргэ үлэлээһин былаанынан «Ааҕабыт бары» өрөспүүбүлүкэтээҕи сетевой бырайыак иһинэн ыытыллар сыллата буолар «Мир Един» единай медиа-урокка кытынна. Бу тэрээһин Саха Өрөспүүбүлүкэтигэр Култуура сылыгар уонна Аан дойдутааҕы «Үрүҥ тайах» (Белая трость) ыйыгар анаммыта.
Бу күн 3-с, 7-с уонна 8-с кылаастар үөрэнээччилэригэр анаан «Уус-уран литэрэтиирэҕэ харахтара көрбөт дьоруойдар» диэн ураты ис хоһоонноох кылаас чаастара ыытылыннылар. Олохтоох бибилэтиэкэ уонна оскуола ситимнээх үлэлэрин хаамыытынан тэрээһини өссө дириҥ, киэҥ хомуурдаах уонна суолталаах оҥордо.
Харахтара көрбөт да буоллар, олоххо уостубат дьулуурдаах, күүстээх санаалаах, атыттарга үтүөнү-сырдыгы аҕалбыт уус-уран литэрэтиирэ дьоруойдарын туһунан оҕолор улахан интэриэһинэн иһиттилэр. Кинилэр анал аудио-матырыйааллары истэн, презентациялары көрөн, олоххо араас харгыстары көрсөр дьоҥҥо хайдах курдук истиҥ сыһыан, өйдөһүү уонна сомоҕолоһуу наадатын туһунан санааларын үллэһиннилэр.
Бу курдук көрсүһүүлэр сүрүн сыаллара — улаатан эрэр көлүөнэҕэ олох араас очурун көрсүбүт, харахтарынан көрбөт буолбут, аан дойдуну сүрүннээн сүрэхтэринэн көрөр дьоҥҥо амарах сыһыаны иитии, инклюзия өйдөбүлүн тиэрдии уонна, биллэн турар, оҕо үтүө кинигэҕэ тардыһыытын күүһүрдэрэ саарбахтаммат.
Алын, орто сүһүөх ааҕааччыларбытыгар уонна кылаас салайааччыларыгар (3 кылаас сал.: М.Н. Васильева, 7 кылаас сал: Г.В. Бурцева, 8 кылаас сал.: Д.И. Неустроева) көхтөөх кыттыыгыт, иһирэх кэпсэтиигит иһин оскуола салалтатын, олохтоох нэһилиэк бибилэтиэкэрэ П.Е. Парникова аатыттан махталбытын биллэрэбит. Кинигэ куруук барыбытын сомоҕолуутун!
Ньургуяна Хорунова, иитэр үлэҕэ мэтэдьиис