Бэҕэһээ, алтынньы 8 күнүгэр Дьокуускай куоракка доруобуйаларынан хааччахтаах ийэлэргэ «Махтал, ийээ» республикатааҕы күрэс буолан ааста. Манна Уус Алдан доруобуйаларынан хааччахтаах дьон уопсастыбатын аатыттан Өнөр нэһилиэгин олохтооҕо Долгууна Кардашевская кытынна.
Күрэскэ араас улуустан сэттэ кыттааччы үс түһүмэххэ күөн көрүстүлэр. Ол курдук «Сэттэ мэтириэт» айымньы киэбинэн бэйэни билиһиннэрдилэр, талааннарын уонна эриэккэс, сонун бүлүүдэлэрин астаан аҕалан көрдөрдүлэр.
Күрэс түмүгүнэн ырыа куттаах Долгууна Асколоновна «Иэйии куттаах ийэ» анал аат кыайыылааҕа буолла.
Бу үтүө сонуну Уус Алдан улууһун доруобуйаларынан хааччахтаах дьон «Ньургуһун» уопсастыбатын бэрэссэдээтэлэ Елизавета Васильева иһитиннэрэн туран:
– Уопсастыбабыт көхтөөх кыыһа Долгуунабытын бэртээхэй ситиһиитинэн ис сүрэхпититтэн эҕэрдэлиибит! Эйигинэн киэн туттабыт! Чэгиэн доруобуйаны, дьиэ кэргэҥҥэр дьолу-соргуну, дьулууру, саҥаттан-саҥа ситиһиилэри баҕарабыт. Чугас дьонуҥ тапталлара өрүү үрдүккэ кынаттыы турдуннар! – диэн баҕа санаатын тиэрдэр.
Мария Аргунова