Балаҕан ыйын 21 күнүгэр кэллиэксийэньиэр күнэ бэлиэтэнэр. 2016 сыллаахха буолбут Арассыыйа кэллиэксийэньиэрдэрин бастакы сийиэһэ бу күнү бигэргэппитэ. Бороҕоҥҥо «Умсулҕан» кэллиэксийэньиэрдэр түмсүүлэрэ 1994 сыллаахха оройуоннааҕы оҕо бибилэтиэкэтигэр (сэб. Анна Бурнашева) тирэҕирэн төрүттэммитэ. Түмсүүнү Бороҕоннооҕу оҕо искусствотын оскуолатын преподавателэ, СӨ култууратын туйгуна, биллэр кэллиэксийэньиэр Станислав Луковцев салайар. Станислав Николаевиһы көрсөн түмсүү быйылгы сыллааҕы үлэтин сырдатарыгар көрдөстүм.
— Билигин «Умсулҕан» түмсүү 30 чилиэннээх. Манна фалеристиканан, филумениянан, филокартиянан, нумизматиканан, бонистиканан, о.д.а. көрүҥүнэн үлүһүйэн туран дьарыктанааччылар бааллар. Кинилэр арааҺы барытын мунньаллар: харандаастары, уруучукалары, кыра маллары, почта, сибээс, БКЭ, мэдиссиинэ, флора, фауна, успуорт, о.д.а. араас тиэмэлэргэ баай кэллиэксийэлээхтэр. Солбуйааччым Анна Федорова, чилиэннэр Мария Иванова, Мария Борисова, Елизавета Сивцева, Иннокентий Крылов, Матрена Москвитина уо.д.а. үлэҕэ төһүү күүс буолаллар.
Быйылгы сылга үбүлүөйдээх төрөөбүт күннээхтэр быыстапкаларын туруоран дьон сөҕүүтүн, биһирэбилин ыллылар. СӨ үөрэҕириитин үтүөлээх үлэһитэ Елизавета Сивцева Бороҕоҥҥо уонна Дьокуускайга хас да сиргэ киэҥ ис хоһоонноох быыстапканы туруорбута. Киниэхэ Уус-Алдан улууһун бочуоттаах олохтооҕо аат иҥэриллибитэ. Мындаабаҕа олорор Мария Сергеева тэлгэһэтигэр кэллиэксийэтигэр анаан туттарбыт 5×6 м. иэннээх павильонун үөрүүлээх аһыллыыта буолбута. Кини 40-тан тахса сыл муспут кэллиэксийэтэ сылдьыбыт, көрбүт дьону астыннарбыта. Маны тэҥинэн Бороҕоҥҥо Галина Дегтярева кэллиэксийэтин түмэн уурбут балаҕанын, Тулунаҕа Мариса Васильева, Майаҕаска Иннокентий Крылов, Бороҕоҥҥо Матрена Москвитина, Мындаабаҕа Анастасия Жиркова дьиэлэригэр сылдьан кэллиэксийэлэрин сэргээн көрбүттэрэ.
Түмсүү чилиэннэрэ Төҥүлүгэ «Нал» кафе аһыллыытыгар кыттыбыттара, Таатта Харбалааҕар тиийэн уопут атастаһан кэлбиттэрэ. Бу нэдиэлэҕэ Чараҥҥа Кулантай аатынан түмэлгэ Мария Иванова муспут кыра размердаах малларын быыстапката туруоҕа. Бэйэм быйыл сайын салгын флотун күнүгэр аналлаах Саха сирин авиатордарын Үс Хатыҥҥа ыытыллыбыт ыһыахтарыгар ыалдьыт быһыытынан кыттыыны ылбытым. Кэллиэксийэньиэрдэр күнүн көрсө авиация, космонавтика тиэмэтигэр быыстапкабын Мүрү 1 нүөмэрдээх орто оскуолатыгар туруордум.
Үлэбит биир сүрүн тэрээһининэн атырдьах ыйын 29 күнүгэр Дьокуускайга ыытыллыбыт X өрөспүүбүлүкэтээҕи сийиэскэ 8 киҺи баран актыыбынай кыттыыны ылбыттара буолар. Түмсүү бэрэссэдээтэлин солбуйааччы Анна Федорова «СӨ-гэр кэллиэксийэни сайыннарыыга кылаатын иһин» анал үрүҥ көмүс бэлиэнэн наҕараадаламмыта. Быйыл 65 сылын бэлиэтиир улуустааҕы оҕо бибилэтиэкэни (сэб.СӨ култууратын туйгуна Вера Портнягина) кытта холбоһон быйыл ахсыс сылбытын «Дьикти дьарык» бэстибээл — куонкуруһу үөрэнээччилэргэ ыыттыбыт.
Бибилэтиэкэ үлэһитэ Надежда Гоголева бу бэстибээли тэрийэн ыытар үлэтэ биһирэнэн, «СӨ бастыҥ оҕо бибилэтиэкэрэ» куонкурус финалыгар 9 киҺи иҺигэр киирэн кытта сылдьар. Куоластааһын түмүгэ бу ый 30 күнүгэр биллиэхтээх. Түгэнинэн туһанан улуустааҕы оҕо бибилэтиэкэтэ модельнай бибилэтиэкэ аатын ылбытынан, үлэлэрэ биҺирэнэн 8 мөлүйүөннээх Гран анаммытынан эҕэрдэлиибин. Сылы түмүктүүр тэрээһиммитигэр улуус кэллиэксийэньиэрдэрин түмэр былааннаахпыт.
Кэпсэттэ Елена Сыроватская, уопсас.кэрэсп.