Балаҕан ыйын 1 күнэ – Билии күнэ! Бу күн маҥнайгы кылааска кырачаан оҕолор алтан чуораан тыаһынан оскуола боруогун аан маҥнай атыллаан киирдилэр, оттон үрдүкү кылаас үөрэнээччилэрэ инники олохторугар эрэллээх дабайыыны оҥорор күүрүүлээх күннэрэ. Лөгөй лицей-интернатыгар бу бырааһынньык өрүү ураты суолталаах. Манна улуус, республика араас муннугуттан мустан, билиигэ-көрүүгэ баҕалаах, олимпиадаларга уонна научнай конференцияларга кыайыыга дьулуурдаах, активист, спортсмен, инникигэ кэскиллээх оҕолор үөрэнэллэр.
Билии күнүн үтүө сарсыардата Кэптэни сиригэр күһүҥҥү сайаҕас салгынынан, учууталлар уонна үөрэнээччилэр истиҥ мичээрдэринэн саҕаланна. Үөрүүлээх линейка өрөгөй ырыаларын толоруунан арылынна. Лицей оҕолоругар, төрөппүттэригэр уонна педколлективка анаан үрдүк таһымнаах эҕэрдэ тылларын лицей дириэктэрэ М.С.Пахомов, Лөгөй нэһилиэгин баһылыга Н.Н Попов уонна Уус Алдан улууһун үөрэҕин салататын начальнигын солбуйааччы М.П Пухов тиэртилэр. Кинилэр бэлиэтээбиттэринэн, Лөгөй лицейэ сылтан сыл көрдөрүүтүн тупсаран, улуус эрэ буолбакка, өрөспүүбүлүкэ таһымыгар кыахтаах ыччаты иитэн таһаарар бастыҥ кыһа буолар. Быйыл физика уонна музыка кабинеттарыгар оҕолор үөрэнэллэригэр анаан саҥа оборудованиелар, үс кабинекка эбии смарт- телевизор кэлбиттэрин үөрэ иһиттибит.
Бу үөрүүлээх күн 50 сыл аннараа өттүгэр оскуола боруогар үктэммит үөрэнээччилэр, о.э 1986 сыллаах Лөгөй оскуолатын выпускниктара маҥнайгы кылаас оҕолоругар, үтүөнү баҕаран туран, сэмэй бэлэхтэрин туттардылар. Маны тэҥэ 25 сыл анараа өттүгэр оскуоланы бүтэрбит 2001 сыллаах Лөгөй орто оскуолатын уонна Саха-Бельгийскэй гимназия выпускниктара оскуола кэмнэрин олус сылаастык санаан тураннар, лицейгэ бэйэлэрин бэлэхтэрин ууннулар. Оттон быйылгы выпускниктарбыт үгэһи тутуһан, кырачаан бырааттарыгар, балтыларыгар эҕэрдэ тыллаах сэмэй бэлэхтэри туттардылар.
Бары мустубут дьоҥҥо-сэргэҕэ 11 кылаас «Школьный вальс» үҥкүү анаатылар, 9 кылаастар Россия бары үөрэнээччилэрин «Самолетик будущего» акция чэрчитинэн флеш-мобка кыттыстылар. Оттон үөрүүлээх линейка долгутуулаах түгэнин лицей кэккэтигэр саҥа киирбит 9 үөрэнээччи учууталлара Валентина Гаврильевна Нафанаилованы уонна 1 кылаас үөрэнээччилэрин кытары толорон оскуолаҕа үөрэҕи саҕалыыр маҥнайгы чуорааны чугдаара тыаһатан, саҥа 2026–2027 үөрэх сыла арыллыбытын туоһулаатылар.
Быйыл уопсайа 210 үөрэнээччи буолан үөрэхпит сылын саҕалыыбыт. Бу үөрэх дьылыгар информатика учууталынан, биһиги оскуолабыт 2021 сыллаах выпускницата Валентина Вячеславовна Алексеева үлэтин саҕалаата. Кини бэйэтин үөрэммит кыһатыгар учуутал быһыытынан төннөн кэлбитэ олус кэрэхсэбиллээх . Кинини тэҥэ Сивцева Амелия Ньургуновна диэн педагог-психолог үлэлии кэллэ. Бу эдэр педагогтарга үлэҕэ ситиһиилэри, саҥа саҕалааһыннары олоххо хорсуннук киллэрэллэригэр баҕарабыт!
Ол курдук, быйыл Лөгөй лицей -интернатыгар суолталаах уларыйыылар таҕыстылар. Салайар үлэҕэ уопутурбут, бэйэтин идэтигэр бэриниилээх лицейбит директора Михаил Петрович Пухов быйыл 2026 сылга, улуустааҕы үөрэҕирии салалтатын начаалынньыгын солбуйааччытынан үлэҕэ ыҥырылынна. Оттон Лөгөй лицей-интернатын саҥа дириэктэринэн Максим Семенович Пахомов ананна. Убаастыыр уопуттаах учууталларбытыгар саҥа үлэҕэ өссө элбэх кыайыыны-хотууну баҕарабыт!
Ааспыт үс ыйдаах кэтэһиилээх сайыҥҥы сынньалаҥ кэмигэр биһиги лицейбит үлэтэ күөстүү оргуйбута: кыра кылаастарга «Цифра +» диэн күнүскү лааҕыр Валентина Гаврильевна Нафанаилова салайыытынан ситиһилээхтик улэлээн 1 сезону түмүктээбитэ. Иккис сезоҥҥа «Каникулярная школа» 9 -11 кылаастарга (сал. М.Н.Хабарова) тэриллэн, уопсайа 120 оҕо лааҕырынан хааччыллыбыта.
Оскуола сыллара уруоктар эрэ буолбакка, чаҕылхай түгэннэри, үөрүүнү, сылаас сыһыаны, саҥа ситиһиилэри бэлэхтииллэр. Иннибитигэр айар үлэ, сатабыл, сыралаах үөрэх уонна оскуола олоҕун умнуллубат саҥа сыла, кэрэ түгэннэрэ күүтэллэр!
Лөгөй лицей-интернатын үөрэнээччилэригэр, коллективыгар уонна төрөппүттэргэ саҥа үөрэх сылыгар үрдүк ситиһиилэри, саҥа арыйыылары уонна чиҥ билиини баҕарабын!
Янис СЫСОЛЯТИН, lX кылаас, Лөгөй лицей-интернат “SiTiM LegMedia” юнкора, Кэптэни