Улуус иһинэн тэриллибит уматыгы кэтиир оперативнай штаб салайааччыта Руслан Герасимов иһитиннэринэн, сапыраапкаларга уматык баар, бигэргэммит хааччаҕынан уларыйыыта суох кута тураллар. Өрөбүллэргэ Мындаабаҕа баар “Туймаада-Нефть” сапыраапкатыгар бензин бүтэ сылдьыбыта, ол эрээри тутатына бензовоз кэлэн, үлэ сөргүтүллүбүтэ.
Сапыраапкалар кутар быраабылалара
Мындаабатааҕы “Туймаада-Нефть” сапыраапката:
- 92-лээх бензин – биир массыынаҕа 20 л, төлөбүрэ харчынан уонна баан каартатынан;
- 95-тээх бензин – төлөпүөҥҥэ “Туймаада-Нефть” сыһыарыытын туруорунан 20 л уонна уматык (топливнай) каартатынан;
- дизельнай уматык – уматык (топливнай) каартанан.
Тандаҕа баар “Туймаада-Нефть” сапыраапката эмиэ итинник ирдэбиллээх, эрээри 95-тээх бензин суох.
“Саханефтегазсбыт” Бороҕоннооҕу сапыраапката:
- 92-лээх бензин – биир массыынаҕа 20 л, күҥҥэ 550 л, ол иһигэр олоҕу-дьаһаҕы хааччыйар тэрилтэлэр ортотунан 50 л кутталлар (25 массыына куттуон сөп);
- 95-тээх бензин – биир массыынаҕа 20 л., күҥҥэ 1 тонна;
- дизельнай уматык аҥардас баахха хааччаҕа суох.
“Саханефтегазсбыт” Кэптэнитээҕи сапыраапкатыгар итинник ирдэбил турар, эрээри 95-тээх бензин суох, 92-лээх бензин күннээҕи лимитэ – 300 л, Бэйдиҥэҕэ – 200 л. Суоппардар кэпсииллэринэн уочарат эрдэттэн, күн инниттэн саҕаланар.
«Саханефтегазсбыт» сапыраапкаларыгар лимит бүппүтүн үрдүнэн, 1-кы, 2-с, 3-с группалаах инбэлииттэргэ, анал байыаннай дьайыы бэтэрээннэригэр бензини син биир куталлар эбит. Онуоха инбэлиит уонна бэтэрээн суоппар эбэтэр пассажир быһыытынан бэйэтэ баар буолуохтаах, пааспарын, инбэлиит буоллаҕына ыспыраапкатын, бэтэрээн буоллаҕына дастабырыанньатын илдьэ сылдьыахтаах. Санаттахха, лимит баар да кэмигэр уочарата суох курдары киирэллэрэ көҥүллэнэр.
Анатолий Кириллин