От ыйын 21 күнүгэр улууспут олоҕор улахан суолталаах, кэскиллээх тэрээһин буолан ааста. СӨ Ыччат дьыалаларыгар уонна социальнай коммуникацияҕа миниистирэ Петр Шамаев Уус Алдан улууһун көхтөөх ыччатын, волонтердарын уонна эдэр исписэлиистэрин кытары сирэй көрсөн, аһаҕастык уонна ирэ-хоро кэпсэттэ.
Бу көрсүһүүгэ ураты тыҥааһыннаах, бүгүн тыа сирин эдэр дьонун ордук долгутар олох-дьаһах уонна сокуон хайысхатыгар сыһыаннаах ураты сытыы боппуруостар көтөҕүлүннүлэр. Көрсүһүү халыыптаммыт официальнай муоданан буолбакка, олох кыһалҕатын ортотуттан үөскээбит үс сүрүн хайысханы тула сытыытык барда.
Ил Дархан грана: салгыы хайдах үлэлиэҕэй?
Ыччат бастыҥ идеяларын, айар былааннарын уонна уопсастыбаннай бырайыактарын олоххо киллэрэргэ Ил Дархан граннара бүгүн тыа ыччатыгар улахан тирэх буолалларын эдэр дьон бэлиэтээтилэр. Көрсүһүүгэ бу улахан таһымнаах өйөбүл салгыы хайдах кэҥээн иһэрин туһунан ыйытыы уочаратынан туруорулунна. Миниистир хоруйдаабытынан, грант таһыма уларыйбат, төттөрүтүн, тыа сирин ыччатын көҕүлүүр сыалтан улуустарга анаан туспа хайысхалар кэҥээн иһэллэр. Петр Витальевич бэйэтин санаатын кытары үллэһиннэ: маннык грант күрэһигэр тыа сиригэр ордук түөлбэ үлэтэ дьэҥкэтик көстөр. Тыа олоҕо тупсарыгар уонна ис күүһэ арылларыгар бу курдук күрэстэр дьоһун тирэх буолалларын кини тоһоҕолоон бэлиэтээтэ. Петр Шамаев Уус Алдан эдэр кэскиллээх дьонун өрөспүүбүлүкэ таһымнаах куонкурстарга уонна граннарга куттаммакка, хорсуннук кыттарга, бырайыактарын көмүскүүргэ ыҥырда.
Уочарат бытаан: элбэх оҕолоохтор кыһалҕалара
Көрсүһүү саамай долгутуулаах өрүтүнэн тыа сиригэр олорор элбэх оҕолоох ыалларга дьиэ-уот усулуобуйатын тупсарыы (социальнай төлөбүр, субсидия) уонна сир учаастагын ылыы боппуруоһа буолла. Эдэр дьон уочарат олус бытааннык барарын, күүтүү сыллара уһуурун уонна үбүлээһин тиийбэтин аһаҕастык эттилэр. Бу боппуруос өрөспүүбүлүкэ бырабыыталыстыбатын таһымыгар ураты хонтуруолга куруук көрүллэрин миниистир бигэргэттэ. Уочараты ыксатар уонна дьон эрэйин аччатар туһуттан сир оннугар харчынан толуйууну ылар кыаҕы кэҥэтии, ону тэҥэ уочараттары электроннай көрүҥҥэ көһөрөн, аһаҕас, ыраас оҥоруу үлэтэ бара турарын эттэ. Көрсүһүүгэ көтөҕүллүбүт чопчу этиилэр бары тустаах министэристибэлэргэ тиэрдиллиэхтэрэ диэн эрэннэрдилэр.
Эколог көрүүтэ: балык ыстараабын кээмэйэ улахана дьону эрэйдиир
Көрсүһүү саамай тыҥааһыннаах өрүтүнэн эколог идэлээх ыччат көтөхпүт боппуруостара буолла. Кинилэр бүгүн тыа сирин олохтоохторугар саамай ыарахан төлөбүрүнэн охсор федеральнай сокуону – Кыһыл кинигэҕэ киирбит уонна ураты көрүҥ балыктарга ууруллар ыстарааптар кээмэйдэрин кыччатары туруорустулар. Сокуоннай сааһыланыы кытаанах буолан, ууруллар ыстараап уонна хоромньу кээмэйэ олохтоох дьон олоҕор, төрүт дьарыгыгар улахан харгыстары уонна ыарахаттары үөскэтэрин сытыытык таарыйдылар. Миниистир бэлиэтээбитинэн, Ил Түмэн депутаттара уонна бырабыыталыстыба бу боппуруоһу (айылҕаҕа хоромньуну суоттуур федеральнай таксалары) уларытарга, олохтоох усулуобуйаны учуоттуулларыгар федеральнай таһымҥа хас да төгүл дьоһуннаахтык туруорсубуттар. Итини срэгэ, Петр Витальевич тыа сирин ыччата бэйэтин олоҕун, төрөөбүт дойдутун кыһалҕатын куттаммакка, чахчы эколог быһыытынан туруорсара уонна сытыытык кэпсэтэрэ олус суолталаах диэн үрдүктүк сыаналаата.
Бүгүҥҥү күннээҕи олох уустук боппуруостарын хорсуннук көтөхпүт Уус Алдан ыччатын санаата истилиннэ. Эдэр дьон этиилэрэ уонна кыһалҕалара үрдүккэ тиэрдиллэн, олохтоох былаас таһымыгар чопчу үлэлэр саҕаланыахтара диэн кэтэһэбит.
Алина Герасимова