“Этиллибит тыл сойо илигинэ…” диэбиккэ дылы, Ил Дархан элбэх оҕолоох, анал байыаннай дьайыы кыттааччылардаах Окоемовтар дьиэ кэргэннэригэр сылдьыбытын кэнниттэн, бүгүн Мүрү нэһилиэгин «Маяк» түөлбэтин олохтоохторугар ититиигэ холбонууга салайааччылары кытары көрсүһүү тэрилиннэ.
Көрсүһүүгэ улуус баһылыга Василий Алексеев, Мүрү нэһилиэгин баһылыга Прокопий Румянцев, «ТМС+» ХЭТ сүрүн дириэктэрэ Александр Евдокимов уонна Александр Гуляев кытыннылар.
Билиҥҥи «Маяк» түөлбэ үс түөлбэттэн холбоспута, Бороҕон сэлиэнньэтин илин өттүгэр тайаан сытар. Түөлбэ олохтоохторо хочуолунай тутуллан, дьиэлэригэр ититии киирэрин туруорсубуттара ыраатта. Үс сыллааҕыта уопсай мунньах быһаарыытынан харчы кыттыһан, ититиигэ холбонуу үлэтин ыыта туруохха диэн сүбэлэспиттэрэ. Бу бырайыагынан ититиигэ 148 дьиэ холбонуохтааҕа, хас биирдии дьиэлээх хаһаайыстыба 129 тыһыынча солкуобайы кыттыспыттара. Бу харчы билигин оҥоһуллубут үлэҕэ: итии уу ситимин тардыыга, турбатын уонна онно сыһыаннаах чаастары атыылаһарга туһуламмыта, харчы ороскуотун олохтоохторго отчуоттаабыттара. Ону сэргэ хочуолунай тутуохтаах «ТМС+» ХЭТ номнуо хочуолун Новосибирскайга сакаастаан, сыанатын 40 бырыһыанын төлөөбүт эбит. Үлэ салгыы барыаҕын, тэрилтэ оттук субсидиятыгар харчы кыайан ылбакка, тохтоон хаалбыта. Тэрилтэ ыһыктынан баран олорботох, быыс-хайаҕас булан былырыыҥҥыттан кирэдьиит эккирэппиттэр. Ол эрээри бааннар Саха сиригэр ОДьКХ боппуруоһа уустук диэн, онуоха «ТМС+» тэрилтэ бөҕө тирэхтээҕин көрө да сатаабакка, аккаас биэрэ олорбуттар. Бу сырыыга кирэдьиит сайаапкатын, туох баар туһааннаах докумуоннары эккирэтэн, бырабыыталыстыбаҕа анал исписэлиистэри кытары кэпсэтэн, “Алмаасэргиэнбааҥҥа” биэрбиттэр уонна: «Бүгүн Айсен Николаев Уус Алдаҥҥа сырыытыгар ититии киирэрин өйөөбүтүттэн да сэрэйдэххэ, кирэдьииккэ эрэлбит улахан», – диэн этэллэр.
Олохтоохтор үс сылы быһа кэтэһэн санаалара саппаҕырбытын тиэрдэллэр, социальнай ситимҥэ арыллыбыт бөлөххө этиһии тахсар, чуолаан түөлбэ актыыбын, салайааччылары сэмэлээн суруйаллар эбит. Биллэн турар, харчы кыттыһан баран, үс сылы быһа кэтэһэр абалаах, ол эрээри тулуурдаах буолуоххайыҥ, ититии киирэригэр биир эрэ хардыы хаалла диэн мэктиэлииллэр. «ТМС+» ХЭТ өттүттэн харчы көстүө диэн 99 бырыһыан эрэллээхтэр, үлэ бара турар, ол курдук кыһыны туоруур чох номнуо кэлбит, харчы түстэр эрэ үлэ былаана барыта тыырыллан турар. Быһа сабаҕалаан, матырыйаал айаннаан кэлэр болдьоҕун кытары суоттаан туран икки ый кэриҥэ кэмҥэ бүтэриэхтэрин сөп.
Онон олохтоохторго өссө кыратык тулууру, оттон «ТМС+» тэрилтэҕэ ылсыбыттара сатанарын баҕарабыт.
Анатолий Кириллин