Саха сиригэр, Арассыыйаҕа да буолуон сөп, ахсааннаах “Запад-2” 24 МВт кыамталаах чоҕунан оттуллар механизированнай хочуолунай Бороҕон сэлиэнньэтигэр быйыл күһүн үлэҕэ киирээри турар.
Ил Дархан Айсен Николаев Уус Алдаҥҥа үлэтинэн сырыытыгар бу хочуолунай тутуутун билистэ. Сүрүн бэдэрээччит бэрэстэбиитэлэ кэпсээбитинэн, хочуолунай туох баар тэрилэ Арассыыйаҕа оҥоһуллубут, ону таһынан хочуолларын бэдэрээччит бэйэтэ оҥорон таһаарбыт. Билигин тутуу 89 бырыһыана бүтэн, силигин ситээри турар эбит.
“Инженерные сети-проекты” ХЭТ ПТО инженерэ Антон Ковалев:
– Быйылгы оттук сезонугар хочуолунайы үлэҕэ киллэрэргэ бэлэммит бүтэн эрэр. Эбийиэги атырдьах ыйын 30 күнүгэр диэри үлэлэтэн көрүөхпүт диэн сабаҕалыыбыт, оннук соруктаахпыт. Бастакы үлэлэтэн көрүү кэнниттэн барыта кэминэн, сөптөөх диэтэхпитинэ, хочуолунайы сакаасчыкка, о.э. «СӨ ДьУоКХ» ГУТ Уус Алданнааҕы филиалыгар, туттарыахпыт, – диэн иһитиннэрдэ.
Анатолий Кириллин