Бүгүн Уус Алдан тыа хаһаайыстыбатын үлэһиттэригэр, бааһынай-фермерскай хаһаайыстыбаларга уонна урбаанньыттарга үөрүүлээх түгэн буолла – саҥа тиэхиньикэлэр күлүүстэрин үөрүүлээх быһыыга-майгыга туттулар.
Күлүүстэри Ил Дархан Айсен Николаев бэйэтэ туттартаата. Тиэхиньикэлэри тыа хаһаайыстыбатын бородууксуйатын оҥорооччулары өйүүр федеральнай бырагыраамананан ылбыттара. Айсен Сергеевич тыл этэригэр инникитин өссө кыра кыахтаах тиэхиньикэлэринэн хааччыйарга кыһаллыахпыт диэтэ. «МТЗ-82.1 Беларус» тыраахтары Никита Готовцев, Иван Барашков, Гаврил Алексеев, Егор Находкин, Иван Гоголев, Сергей Румянцев, Антон Ушницкай, Дмитрий Жирков, Иван Копырин, Мирослав Черкашин уонна Николай Явловскай ыллылар. «УАЗ»-фермер массыыналар күлүүстэрин Анатолий Бурнашев, Егор Васильев, Алгыс Нестерев, Дмитрий Илларионов туттулар.
Уус Алдан улууһугар тыа хаһаайыстыбатын сүрүннээччилэр ааттарыттан Анатолий Бурнашев Ил Дархаҥҥа, министиэристибэҕэ, улуус дьаһалтатыгар махтал тылларын тиэртэ, бэриллибит тиэхиникэ кинилэргэ күүс-көмө, тирэх буолуоҕун бэлиэтээтэ.
Алгыс Нестерев:
– Дүпсүҥҥэ сылгы иитиинэн дьарыгырабын. Субсидияҕа хапсан, бүгүн «УАЗ»-фермер массыына күлүүһүн тутан турабын. Олус үчүгэй, биһиги үлэбитигэр маннык субсидия баара туһалаах, төһүү күүс буолар, – диэн үөрүүтүн үллэһиннэ.
Анатолий Кириллин