Сайын оҕо улаатар, күүс-уох эбинэр, иммунитетын бөҕөргөтөр кэмэ. Бу кэмҥэ оҕо аһылыгын сөпкө тэрийии ураты болҕомтону эрэйэр.
Бастатан туран, уу иһэр кэрискэни тутуһар булгуччулаах. Куйааска оҕо этэ-сиинэ ууну түргэнник сүтэрэр, онон дьиэҕэ да, ордук таһырдьа сылдьар кэмигэр өрүү ыраас уу баар буолуохтаах. Газировка уонна маҕаһыын соктарын биэрбэт ордук, саахара элбэх буолан утатыыны күүһүрдэллэр. Ол оннугар бэйэ оҥорбут муоруһа эбэтэр хомпуота туһалаах буолуоҕа.
Сайын оҕуруот аһа, фрукта уонна отоннор ситэр-хотор, сибиэһэйдии үүнэр кэмнэрэ. Бу сибиэһэй битэмииннээх үүнээйи аһылыктар оҕо күннээҕи аһылыгар баар буолаллара ирдэнэр. Ордук олохтоох сибиэһэй аска тирэниҥ. Ол курдук тэпилииссэттэн саҥа үргэммит оҕурсу, минньигэс эдэр моркуоп уонна кабачок, укроп, петрушка, күөх луук оҕо ис уорганын үлэтигэр, тымырдарыгар олус туһалаахтар. Онтон Сахабыт сирин сибиэһэй отонноро – дьэдьэн, хаптаҕас, моонньоҕон – оҕо туругун бөҕөргөтөр «С» битэмииннэринэн баай буолаллар. Манна даҕатан эттэххэ, сахалыы үгэс буолбут сибиэһэй отонноох күөрчэх оҕо уҥуоҕун, тииһин бөҕөргөтөр, ханнык да маҕаһыын йогуруттан туһалаах десерт буоларын умнумуоҕуҥ.
Сайыҥҥы кэмҥэ оҕо күнүс куйааска аһыан баҕарбат буоллаҕына, күүһүнэн аһатар сыыһа. Эт уонна балык курдук ыарахан аһылыктары сарсыарда эбэтэр киэһэ сөрүүн түһүүтэ биэрэр ордук. Онтон күнүс чэпчэки оҕуруот аһыттан миин эбэтэр салаат, фрукта сөп буолар.
Сайыҥҥы кэмҥэ ас куйааска түргэнник буортуйар, бэлэм аһылыгы хос иһигэр икки чаастан ордук туруоруллубат. Оҕо аһыан иннинэ илиитин, ону тэҥэ оҕуруот аһын, фрукталары булгуччу үчүгэйдик сууйаргытын умнумаҥ. Сайыҥҥы битэмииннээх аһылык оҕоҕут доруобуйатын тупсаран, кэлэр кыһын ыалдьыбатыгар тирэх буолуоҕа.