Сыл ахсын Суотту орто оскуолатын иһинэн «Кэскил» үлэ-сынньалаҥ лааҕыра оҕолору толору хабан икки сезонунан үлэлиир.
Быйыл биир сезон көрүллэн 43 оҕо, ол иһигэр анал байыаннай дьайыы оҕолоро, элбэх оҕолоохтор, тулаайах оҕолор, доруобуйаларынан хааччахтаах оҕолору хабан үлэбитин түмүктээтибит. Лааҕыр начальнигынан Елизавета Портнягина, иитээччинэн Федосия Сыроватская, мед. үлэһитинэн Мария Крылова, поварынан Евгения Сивцева үлэлээтибит. Лааҕыр сүрүн сыала оҕону үлэнэн иитии буолар. Оскуола таһыгар 2 тыһыынчаттан тахса сибэкки олордулунна, 26 суорт хортуоппуй ыһылынна. Барыта 160 гаа сиргэ сүбүөкүлэ, моркуоп, 200-түү ук помидор, биэрэс, 150 ук оҕурсу, арбуз, баклажан, кабачок, о.д.а үүнээйилэр үүнэ тураллар.
Оҕо сайыҥҥы сынньалаҥ кэмигэр өй-санаа, эт-хаан өттүнэн сайдарыгар сылын аайы араас хайысханы тутуһабыт. Холобур, былырыын тэттик «Ералаштары» устубуппут, ол иннинээҕи сыл Н. Харлампьева тылыгар, Егор Тулуйхан дьүрүлүгэр «Сайын» диэн ырыаҕа видеоклип устубуппут, оттон быйыл суруналыыстыка хайысхатынан оҕолор бэйэлэрин холонон көрдүлэр.
Үгэс курдук лааҕыр үлэтин кэмигэр үөрэхтээһин айаныгар турунабыт, Мүрү 2-с №-дээх оскуола иһинэн тэриллибит «Ай-тут» лааҕыр оҕолорун кытта доҕордоһуу көрсүһүүгэ, Аллараа Бэстээх Хотун Мааччыйа сиригэр оҕолор да, үлэһиттэр да астына сынньанныбыт, лааҕыр бүтэһик күнүгэр оскуолабыт Ала Соболоох сайылыгар хонон, айылҕалыын алтыһан, бастыҥнары чиэстээн үөрүүлээх быһыыга-майгыга лааҕыры түмүктээбиппит.
Елизавета Портнягина, лааҕыр начальнига