Быйыл сайын Лөгөй лицей-интернатын базатыгар кыра кылаастарга «Цифра +» диэн лааҕыр Валентина Нафанаилова салайыытынан ситиһилээхтик үлэлээн, 1-кы сезону түмүктээтэ. Оттон 2-с сезон – «Каникуллааҕы оскуола» – 9-11 кылаастарга ананна (сал. М.Н. Хабарова).
«Каникуллааҕы оскуола» ураты бырайыак үлэлээбитэ толору биэс сыл буолла. Бу күннэргэ 9-с сезонун саҕалаабыт «Каникуллааҕы оскуолабыт» сүрүн уратыта – оҕолору судаарыстыбаннай аттестацияны (ГИА: ОГЭ/ЕГЭ) ситиһиилээхтик туттаралларыгар бэлэмнээһин. Ол иһин каникуллааҕы оскуолаҕа үрдүк көрдөрүүлээх, уопуттаах учууталлар ыҥырыллан үөрэтэллэр, маастар-кылаастары тэрийэн ыыталлар.
Үөрэх сүрүнэ: математикаҕа уустук сорудахтары уонна геометрия хайысхаларын судургутук суоттуур ньымалары ырытыы, нуучча тылыгар өйтөн уонна аахпыттан суруйуу сүрүн ирдэбиллэрин, грамматика уратыларын быһаарыы, английскай тылга саҥарыы (говорение) уонна истэн өйдөөһүн (аудирование) чаастарыгар сыыһалары таһаарбат туһунан практика, обществознаниеҕа олохтоох сокуоннары, тиэрминнэри уонна суруйар куолулары ымпыгын-чымпыгын тиэрдии.
Уопуттаах педагогтар хас биирдии оҕоҕо ураты сыһыаны олохтоон, ГИА сорудахтарын үрдүк баалга толоруу уратыларын, кистэлэҥнэрин сиһилии быһааран биэрэллэр. Бу курдук бэлэмнэнии оҕолор тус күүстэригэр эрэллэрин улаатыннарар уонна инникитин үөрэхтэригэр улахан тирэх буолар.
Каникуллааҕы оскуола оҕолорго саҥа билиини кытта саҥа доҕоттору бэлэхтиир. Үөрэх кэнниттэн баһаатайдар Саха сиринээҕи лигаларын эрчимнээх баһаатайдара элбэх тэрээһини былаанныллар: «Квест-игра», «Большая игра», «Точь-в-точь», «Киинэ устуута» уо.д.а.
Салгыы быйылгы сезоҥҥа кэлбит оҕолортон санааларын сэргиэҕиҥ.
Уйгулаана Бочкарева, ЛЛИ үөрэнээччитэ:
– Лааҕыр үлэтин тосхоло олус үчүгэй, күн аайы араас оонньуулар, тэрээһиннэр, маны тэҥэ сайын устата ОГЭ-ҕа күүстээх бэлэм буолар.
Вилена Васильева, Мүрү 1-гы №-дээх орто оскуолатын үөрэнээччитэ:
–Үөрэх кэнниттэн ыытыллар тэрээһиннэр олус интэриэһинэйдэр. Холобур, бэҕэһээ этэрээтинэн киинэ устан, 1-кы миэстэ буоллубут. Бары наһаа кыһаллан туруммуппут, ол иһин үлэбит түмүгүттэн олус үөрдүбүт. Баһаатайдарбыт наһаа бэһиэлэйдэр, араас оонньуу бөҕөнү билэллэр, аралдьыталлар, көмөлөһөллөр. Ойуччу тутан асчыттарбытыгар уонна учууталларбытыгар махтанабын. Мин эрдэ өйдөөбөтөх тиэмэлэрбин номнуо өйдөөтүм.
Бу курдук оҕолорго анаан тэриллэр лааҕыр үлэтигэр кыттыспыт каникуллааҕы оскуолабыт улахан кэлэктиибигэр биир хамаанда буолан ураты бырайыагы олоххо киллэрэ сылдьарбыт иһин истиҥник махтанабыт!
Марианна Хабарова, лааҕыр салайааччыта