Саха сиригэр регионнааҕы суолталаах суоллары өрөмүөннүүр үлэ “Олоххо анаммыт инфраструктура” национальнай бырайыагынан оҥоһуллар. Уус Алдан улууһугар “Бороҕон – Танда” хайысхаҕа өрөспүүбүлүкэ көрөр-истэр суолу нуормаҕа эппиэттэһэр туруктаах оҥорорго 4-с км-тан 32-с км диэри өрөмүөн үлэтэ үс түһүмэҕинэн ыытыллара былааннаммыта. Оттон 2024 сыллаахха Танда бөһүөлэгин олохтоохторун туруорсууларынан бастакы 4 км өрөмүөнэ “Хаачыстыбалаах куттала суох суоллар” национальнай бырайыагынан өрөмүөннэммитэ.
Бастакы түһүмэххэ 4-с км-тан 14-с км диэри 10 км өрөмүөннэммитэ, оттон иккис түһүмэх эмиэ 10 км кэрчиги хабар, 14-с км-тан 24-с км диэри өрөмүөннэниэхтээх. Онуоха 19-с км-тан 24-с км диэри үлэ бүппүтэ, быйыл бэдэрээччит хаалбыт 14-с км-тан 19-с км-га диэри 5км кэрчиккэ өрөмүөн үлэтин бүтэрэр соруктаах.
Бэдэрээччит иһитиннэриитинэн, ааспыт сылтан эбийиэккэ уу ыытар 9 турба түһэриллибит, билигин 6 турбаны таҥыы уонна суол өрөмүөнүгэр туттулар матырыйаалы таһыы үлэтэ оҥоһуллубут.
Үһүс түһүмэххэ 2027 сылга 28 км уһуннаах кэрчик өрөмүөннэннэҕинэ, эбийиэк бүтүннүү олоххо киириэхтээх.
СӨ айан суолларын управлениетын иһитиннэриитинэн