Саха сирин ИДьМ идэҕэ бэлэмниир киинин базатыгар «Таежный герой» диэн өрөспүүбүлүкэтээҕи байыаннай-спортивнай оонньуу от ыйын 8-10 күннэригэр ыытылынна. Бу күрэс быйыл 15-с төгүлүн тэрилиннэ, барыта 220 оҕо аҕыс улуустан, Дьокуускайтан, Жатайтан 22 хамаандаҕа кытынна.
Биһиги улууспутуттан Мүрү 1-кы №-дээх орто оскуолатыттан Женя Бочкарев (9 «в») хамандыырдаах хамаандаҕа Максим Потапов (9 «в»), Саша Софронов (10 «б»), Алеша Торговкин (9 «а»), Айысхан Рожин (9 «в»), Жанна Иванова (9 «г»), Сайыына Соловьева (9 «г»), Карина Протопопова (10 «в»), Мүрүтээҕи уолаттар гимназияларыттан Аслан Иванов (9 кыл.), Мүрү 2-с №-дээх орто оскуолатыттан Арылхан Готовцев (8 кыл.) сүүмэрдэммиттэрэ. Хамаанданы РФ Ис Дьыалаҕа министерствотын СӨ Уус Алданнааҕы салаатын сокуоннай саастарын туола илик оҕолор дьыалаларын көрөр подразделение инспектора, полиция старшай лейтенаннара Наталья Николаева уонна Лилианна Березкина салайан илдьэ сырыттылар.
Бастакы күҥҥэ ИДьМ Росгвардия ОМОН сулууспата тэрийбит байыаннай эстафетаны кытта 10 станциялаах оонньуу, визитка күрэһэ ыытыллыбыта. Станциялар ааттара: автоматы ыһыы, хомуйуу, «РХБЗ» бириэмэҕэ кэтии,бастакы суһал көмөнү оҥоруу», «Синхрон», «Гусеничный забег», «Таежка в тренде», «Россия геройдара», «Камень-ножницы-бумага», «Оператор БПЛА» беспилотнигы көтүтүү, «Пол – это лава», «Танцевальный бум» диэн үҥкүү күрэһэ.
Киэһэ өттүгэр хамаандалар икки ардыларыгар музыкальнай визитка күрэһэ буолбута, онно биһиги оҕолорбут үҥкүү үөрэтэн тиийэн наһаа үчүгэйдик үҥкүүлээн дьүүллүүр сүбэ уонна көрөөччүлэр биһирэбиллэрин ылыахтарын ылбыттара.
Бастакы күн түмүгүнэн байыаннай эстафетаҕа уонна визиткаҕа Уус Алдан улууһун «Мүрү» хамаандата 1-кы миэстэни ылары ситиспитэ.
Иккис күҥҥэ оҕолорго анаан элбэх сэргэхситэр тэрээһин ыытыллыбыта. Ол курдук Кыайыы болуоссатыгар экскурсия, ГИБДД, ЫБМ, Росгвардия подразделениеларын спецтехникаларын көрүү, хаартыскаҕа түһүү күрэһэ, лазертаг, бассейҥҥа бириэмэҕэ харбааһын, киинэ, мотоцикллар бөлөхтөрүн көрдүбүт.
ИДьМ үөрэнэр киинин полигонугар оҕолорго “балаакка куорат” тэрийдилэр, “хонуу куукунатыгар” күҥҥэ биэстэ олус минньигэстик аһаттылар.
Икки күннээх тыҥааһыннаах күрэс түмүгүнэн: Гран-при иккис төгүлүн – Уус Алдан хамаандата, 1-кы миэстэ – Хаҥалас, 2-с миэстэ – Амма, 3-с миэстэ — Чурапчы.
«Таежный герой» тэрээһин оҕолору түмсүүлээх, иллээх-эйэлээх буоларга көҕүлүүр. Биллэн турар, бу кэнниттэн оҕолор элбэх саҥа доҕордоноллор, биир хамаанда буолан үлэлииргэ үөрэнэллэр, ону тэҥэ чаҕылхай, умнуллубат сайыҥҥы күннэри атаараллар. Уус Алданнааҕы Ис дьыала отдела оҕолору тэрийэн-бэрийэн ыытарга көмөлөспүт улуус дьаһалтатыгар, ыччат салаатыгар, үөрэх, култуура салалталарыгар махталын биллэрэр. Кыттыбыт оҕолорбутун, кинилэр төрөппүттэрин итиитик-истиҥник эҕэрдэлиибит, улуустарын аатын үрдүктүк ааттаппыттарыгар махтанабыт.
Наталья Николаева, ПДН инспектора