Ыам ыйын 27 күнүгэр Күлүмнүүр аатынан култуура дыбарыаһыгар Библиотека үлэһиттэрин идэлээх күнэ үгүс ааҕааччы, ыалдьыт кыттыылаах үрдүк таһымнаахтык ыытылынна. Мустубут ыалдьыттары улуус баһылыгын солбуйааччы Григорий Аргунов, оройуон Сэбиэтин бэрэссэдээтэлэ Иннокентий Аммосов, Мүрү нэһилиэгин баһылыга Прокопий Румянцев, улуус культураҕа салаатын начаалынньыга Эльза Киренская ааҕар балаҕантан саҕалаан норуоту бүттүүн үөрэхтээһиҥҥэ, кинигэ көлүөнэлэри сибээстииригэр өҥөлөөх, библиотека дьыалатын сайдыытыгар кылааттарын киллэрбит үгүс көлүөнэ библиотекардар үлэлэрэ аныгы кэм хайысхаларыгар сөп түбэһэн, электроннай ситим нөҥүө хабар эйгэтэ кэҥииригэр кыахтар баалларын бэлиэтээн туран, дириҥ махталларын тириэртилэр, инники үлэлэригэр үрдүк ситиһиини баҕардылар.
Салгыы улуустааыҕы кииннэммит библиотека тиһигин дириэктэрэ Лена Павлова нэһилиэктэринэн 26 филиаллаах, оҕо библиотекалаах кииннэммит библиотека “Аныгы кэм библиотеката” буолан, бүтүн Арассыыйатааҕы модельнай библиотека ситимигэр киирэн, үүнэр көлүөнэҕэ сахалыы ааҕыыны көҕүлүүргэ Ийэ тыл форумун ыытан, улуустааҕы экология киинэ тэриллэн тулалыыр эйгэни харыстыыр үлэни тэрийиигэ, саҥа технологияларынан сэбилэммит электроннай библиотека, сайт тэрээһиннээх үлэлэрин тула инники үлэ-хамнас тэрээһиннээхтик ыытылларыгар биир идэлээхтэригэр, тэрилтэ бэтэрээннэригэр, социальнай партнердарга барҕа махталын биллэрдэ. Итиэннэ бастыҥ үлэһиттэргэ анал ааттары үөрүүлээх быһыыга-майгыга туттарда. Ол курдук “Идэтигэр бэриниилээх” ааты библиограф Любовь Копырина, “Библиотекарь-новатор” – электроннай ситим библиотекара Тамара Орлова, “За творческую активность” аатынан оҕо библиотекатын кылаабынай библиотекара Варвара Неустроева бэлиэтэннилэр. Ону тэҥэ библиотека үлэтигэр өрүү күүс-көмө буолар тэрилтэлэр, көмөлөһөөччүлэр ааттаннылар. Ол курдук Мүрүтээҕи уолаттар гимназияларын учуутала, филологическай наука кандидата Наталия Бурцева, “Биир ньыгыл Россия” политическай партия улуустааҕы салаатыттан Күннэй Рощина, “Өркөн” оҕо кииниттэн Евдокия Окоемова, көрбөттөр уопсастыбаларын бэрэссэдээтэлэ Дмитрий Аммосов, коллекционердар түмсүүлэриттэн Анна Федорова, Мүрү 1№-дээх орто оскуолатын библиотекардара Люция Бурцева, Дианна Гаврильева, о.д.а.
Бу үөрүүлээх бэлиэ күҥҥэ күннэтэ алтыһар, араас тэрээһиннэри бииргэ тэрийсэр биир санаалаах тэрилтэлэр истиҥ тыллардаах эҕэрдэлэрин тиэртилэр. Ол курдук улуустааҕы социальнай көмүскэл биир кэлим киинэ, Күлүмнүүр аатынан культура дыбарыаһа, “Мүрү саһарҕата” хаһыат кэлэктиибэ, улуустааҕы экология надзорун инспекцията, улуустааҕы үөрэх салаата, о.д.а.
Сыл бастыҥ ааҕааччыларынан Мүрү 1№дээх орто оскуолатын выпускницата Далаана Черкашина, Мүрү 1№-дээх орто оскуолатын музейын салайааччыта Елена Сыроватская, үлэ бэтэрээннэрэ Сария Соркомова, Иннокентий Бурнашев, Альбина Говорова ааттаннылар. Күлүмнүүр төрөөбүтэ 160 сыллаах үбүлүөйүнэн ыытыллыбыт викторина кыайыылаахтарынан – үһүс үрдэлгэ Лөгөйтөн Валентина Бурнашева, иккискэ Курбуһахтан Геннадий Пестряков буоллулар, бастакы үрдэли эрэллээхтик Мүрүттэн Клара Троева ылары ситистилэр.
Үөрүүлээх күн иккис чааһыгар “Идэм миэнэ – библиотекарь” диэн өр сылларга үтүө суобастаахтык үлэлээн, бочуоттаах сынньалаҥҥа тахсыбыт библиотекардары чиэстээһин ыытылынна. Ол курдук Тиит Арыы (II Байаҕантай нэһилиэгэр) 31 сыл устата үлэлээбит СӨ культуратын туйгуна Матрена Аргунова, Курбуһах нэһилиэгин Окоемовка бөһүөлэгин “Духуобунас киинин” библиотекара СӨ культуратын туйгуна Любовь Местникова, Лөгөй нэһилиэгин Хомустаах бөһүөлэгин библиотекара Мария Егорова, улуустааҕы киин библиотека комплектованиеҕа салаатыгар 45 сыл үлэлээбит библиотекарь Мария Крылова чиэстэннилэр. Өр сылларга кинилэри салайан, түмэн үлэлэппит кииннэммит библиотека бочуоттаах дириэктэрэ, СӨ культуратын үтүөлээх үлэһитэ Варвара Окоемова, биир дойдулаахтара, кэллиэгэлэрэ ис сүрэхтэн тахсар тылларынан эҕэрдэлээн, махтанан сылаас тыллары анаатылар. Төһө да үлэттэн тохтоотоллор, улахан уопуттарын, билиилэрин-көрүүлэрин салгыы ыйан-кэрдэн биэрэр бастыҥ наставник, ыллыктаах сүбэһит буолалларыгар эрэнэллэрин биллэрдилэр.
Ити курдук улуус библиотекардарын идэлээх күнэ дириҥ ис хоһооннохтук үгүс киһини, ааҕааччылары, салайааччылары түмэн биир тыынынан ыытылынна.
Светлана Сивцева