Ыам ыйын бүтүүтэ хас биирдии оскуолаҕа саамай долгутуулаах уонна үөрүүлээх бырааһынньык – Тиһэх чуораан күнэ – бэлиэтэнэр. Бу күн оскуоланы бүтэрээччилэр олохторугар саҥа аартык арыллар, инникигэ кынаттыыр кэрэ кэм саҕаланар.
Бүгүн, ыам ыйын 26 күнүгэр, И.С. Портнягин аатынан Сыырдаах орто оскуолатыгар «Тиһэх чуораан» үөрүүлээх линейката буолан ааста. Оскуола тиэргэнэ оҕо-аймах үөрбүт-көппүт саҥатынан уонна долгуйуунан туолла. Үрдүк үөрэххэ, улахан олоххо үктэнэр выпускниктар оскуола уонна учууталлар иннилэригэр махтал тылларын анаатылар. Кинилэр харахтарыгар — кэрэ кэскилгэ эрэл уонна оҕо сааһы атаарыы чуумпу хомолтото көстөр.
Күндү оҕолорбутугар анаан оскуола дириэктэрэ Марианна Петрова, нэһилиэк баһылыга Илья Ильин, кылаас салайааччылара: маҥнайгы учууталлара Надежда Гоголева, 11-с кылаас салайааччыта Диана Гуляева уонна төрөппүттэр сылаас, истиҥ алгыс тылларын баҕардылар. Бу ураты долгутуулаах күҥҥэ выпускниктары, учууталлары уонна төрөппүттэри эҕэрдэлии улуус бэрэстэбиитэллэрэ, ол курдук экономика отделын начальнигын солбуйааччы Туяра Пестрякова, үөрэх управлениятын начальнига Федор Татаринов ыалдьыт быһыытынан кэлэн кытыннылар. Кинилэр бэйэлэрин тылларыгар оҕолор хас биирдиилэрэ улууспут, өрөспүүбүлүкэбит инники кэскилэ буолалларын уонна улахан олоххо үктэнэн, үөрэнэн, үлэлээн дойдуларын сайыннарыахтара диэн улахан эрэллэрин биллэрдилэр. Ону таһынан, оскуоланы ситиһиилээхтик бүтэрбит уонна улуус олоҕор көхтөөхтүк кыттыбыт бастыҥ үөрэнээччилэргэ улуус салалтатын аатыттан грамоталары, эҕэрдэ суруктары үөрүүлээх быһыыга-майгыга туттардылар.
Учууталлар оҕолор идэлэрин таба талан, дойдуларыгар туһалаах дьон буола улааталларыгар эрэллэрин биллэрдилэр. Төрөппүттэр оҕолорун хас биирдии ситиһиитинэн киэн тутталларын уонна хаһан баҕар күүс-көмө буолуохтарын эттилэр. Оскуоланы бүтэрээччилэр үгэс быһыытынан Николай Андросов «Быраһаай, оскуолам» ырыаны толордулар, харда тылы кытары кэлбит ыалдьыттарга, оскуола үлэһиттэригэр өйдөбүнньүк бэлэх туттардылар.
Саамай долгутуулаах түгэнинэн — олох суолугар ыҥырар тиһэх чуораан чугдаара тыаһаабыта буолла. Кинилэр иннилэригэр билигин саамай эппиэтинэстээх кэм — судаарыстыбаннай эксээмэннэри (ОГЭ, ЕГЭ) ситиһиилээхтик туттарыы турар. Тээрээһин выпускниктар ырыанан-хоһоонон аргыстаһан, тэҥҥэ үктэллэнэн дириҥ суолталаах оһуохай үҥкүүлэринэн түмүктэннэ.
Күндү выпускниктар! Оскуолаҕа ылбыт билиигит, доҕордоһуугут олоххо эрэллээх тирэх буоллуннар. Сыалгытын үрдүктүк тутуҥ, ыра санааҕыт хоту айаннааҥ! Суолгут сырдык, айаҥҥыт ситиһиилээх буоллун!
Ньургуяна Хорунова, иитэр үлэҕэ дириэктэри солбуйааччы