Ыам ыйын 20 күнүгэр С.С. Васильев – Борогонскай аатынан киин библиотека тэрийиитинэн В.В. Никифоров – Күлүмнүүр аатынан культура дыбарыаһыгар Мүрү нэһилиэгин тэрилтэлэрин идэлээх сойуустарын икки ардыларыгар “Түмүс. Оонньоо. Кыай” диэн интеллектуальнай оонньуу аҕыс хамаанданы түмэн ыытылынна.
Оонньууга Мындааба “Төлөн”, Мүрү 1 “Тэтим”, 2№-дээх “Тускул” орто оскуолаларын, Мүрүтээҕи уолаттар гимназияларын “Уолан”, улуус киин балыыһатын “Эмчит”, “Мүрүчээнэ” оҕо тэрилтэтин “Виктория”, культура уонна судаарыстыбаннай тэрилтэлэрин боропсойуустарын “Эрэл” хамаандалара билиилэрин-көрүүлэрин тургутустулар.
Биэс араас түһүмэх бэрт сытыытык ыытылынна. Ол курдук “Блиц-боппуруостар”, “Кини кимий?”, “Айымньы аатын, ааптарын таай”, “Ырыа аатын таай”, “Тыл оонньуута” диэн түһүмэхтэргэ саха тылын, литературатын, культуратын, улууспутуттан төрүттээх биллиилээх дьону дириҥник билиигэ-көрүүгэ, талааннарын таһаарыыга тургутууну аастылар. Биэс түһүмэхтээх оонньууну киин библиотека дириэктэрэ Лена Павлова иилээн-саҕалаан бэрт сэргэхтик ыытта. Итиэннэ ккин библиотека үлэһиттэрэ көрөөччүлэргэ араас оонньуулары тэрийдилэр, музыкальнай нүөмэрдэри толордулар. Дьүүллүүр сүбэҕэ киин библиотека үлэһиттэрэ – бэрэссэдээтэлинэн Галина Аммосова, чилиэннэринэн Феврония Федорова, Вера Портнягина үлэлээтилэр. Оонньуу кэмигэр уус-уран самодеятельность кыттыылаахтара Евдокия Васильева, “Тойон Мүрү” культура дыбарыаһын хормейстера Айыына Сивцева, “Эн – сулускун” өрөспүүбүлүкэтээҕи ырыа күрэһин финалиһа Галина Матвеева, киин библиотека үлэһиттэрин квартета ылбаҕай ырыаларын бэлэхтээтилэр.
Онон Арассыыйаҕа норуоттарын сомоҕолоһууларын итиэннэ Саха Өрөспүүбүлүкэтигэр Культура, улууспутугар түмсүү уонна бииргэ үлэлээһин сылларын чэрчитинэн ыытыллыбыт “Түмүс. Оонньоо. Кыай” интеллектуальнай оонньуу бастакы түһүмэҕэ түмүктэннэ. Аны сыл бүтүүтэ финал оонньуутугар кыайыылаах тахсыбыт хамаандалар салгыы оонньуур кыахтаннылар.
Хатыһыылаах киирсиигэ улуустааҕы культура үлэһиттэрин “Күн эйгэ” хамаандата бириистээх үһүс миэстэни, иккиһи “Эрэл” судаарыстыбаннай тэрилтэлэрин уонна общественнай хааччыйыы идэлээх сойууһун хамаандата ылан, үөрүү көтөллөннүлэр. Оттон Мүрү 1№-дээх орто оскуолатын “Тэтим” хамаандата кыайыы өрөгөйүн билэн, дириҥ билиилээхтэрин, түмсүүлээхтэрин көрдөрөн, бар дьонноругар үрдүк ситиһиилээхтик бэлэхтээтилэр.
Светлана Сивцева
Хаартыскалар https://max.ru/id1427002410_gos каналтан