«Уус Алдан улууһун сиригэр-уотугар Өлүөнэ уонна Алдан өрүстэр бу күннэргэ хамсыахтара», – диэн улуус дьаһалтатын пресс-сулууспата иһитиннэрэр.
– Сааскы көмүөлү көрсө муус устар 17-19 күннэригэр Дьокуускайдааҕы ыксаллаах быһыыны-майгыны сүрүннүүр тэрилтэ Уус Алданнааҕы звенотун тэрийиитинэн хамаанда-ыстаап үөрэҕэ ыытыллыбыта. Үөрэх түмүгүнэн улуус дьаһалтата, суһал сулууспалар уонна олохтоохтор сүнньүнэн бэлэмнэрин бэлиэтээбиттэрэ.
Улууспутугар ууга барыан сөптөөх Суотту, Өспөх, Чэриктэй, Түүлээх нэһилиэктэригэр олохтоохтору халаан уутуттан сэрэтэр уонна көмүскүүр үлэлэр былаан быһыытынан ыытыллан, ыксаллаах быһыы-майгы тахсар түгэнигэр бэлэмнэр.
Уу ылыан сөптөөх сирдэригэр 516 олорор дьиэҕэ барыта 2690 киһи, ол иһигэр 260 оҕо, 13 социальнай эбийиэк, 4 хочуолунай уонна 10 уот трансформаторнай станцията хабыллаллар.
Ыксаллаах быһыы-майгы үөскүүр түгэнигэр 360 киһини хабар быстах кэмҥэ олорор 11 пуун үлэлиэҕэ. Ол курдук Суотту нэһилиэгэр Оҕуруоттаахха «Эрэл» спорт саалатыгар 50 киһиэхэ миэстэ, Хоноҕорго Уус Алданнааҕы техникумҥа 30 киһиэхэ, Бороҕон нэһилиэгин Арыы Тиит бөһүөлэгэр оскуола-саад дьиэтигэр 15 киһиэхэ, бөһүөлэккэ ыксаллаах быһыы-майгы тахсар түгэнигэр Тумул орто оскуолатыгар 30 киһиэхэ, Өспөх нэһилиэгэр Дыгдаалга «Сайдам» КСК 35 киһиэхэ, ыксаллаах быһыыга-майгыга Лөгөй лицей-интернатыгар 60 киһиэхэ, Чэриктэй нэһилиэгин оскуолатыгар 50 киһиэхэ, Дүпсүн оскуолатыгар 40 киһиэхэ, оттон Кылаайы сэлиэнньэтигэр Түүлээх орто оскуолатын баазатыгар 20, уһуйаан дьиэтигэр 20, учаастактааҕы балыыһа дьиэтигэр 10 киһиэхэ миэстэлэр бэлэмнэнэн тураллар.
Уу кэлэр түгэнигэр сүөһүнү-сылгыны уу ылбат үрдүк сиргэ таһаарарга анаан сүөһүнү хаайар күрүөлэр өрөмүөннэнэн бэлэмнэр. Халаан кэмигэр бу сүөһүлэри, сылгылары хаайарга аналлаах 11 пууҥҥа 100 киһи, 50 техника, 33 мотуор үлэлиэхтэрэ.
Уу таһымын хонтуруоллуурга 43 гидропост туруоруллубута. Ыксаллаах быһыыны-майыгыны сэрэтэр КСЭОН тэрил нэһилиэктэр ахсын үлэлииргэ бэлэмнэр.
Ыксаллаах быһыыны-майгыны туоратыыга олохтоох бюджеттан биир мөлүйүөн солкуобай үп көрүллэн, содул тахсыбатын туһугар туттуллар.
Халаан уутуттан эмсэҕэлиэн сөптөөх бөһүөлэктэр иһэр уунан, бородууктанан, эминэн-томунан хааччылыннылар. Онон улуус дьаһалтата сааскы халаан уутугар бары хайысханан үлэни ыытан, бэлэмнээх олоробут, – диэн улуус дьаһалтатын пресс-сулууспата биллэрэр.