Бүгүн дойду үрдүнэн бэлиэтэнэр Олохтоох бэйэни салайыныы күнэ Уус Алдан улууһүугар уратытык ыытылынна. Ол курдук бүгүҥҥү тэрээһиҥҥэ “Уолан” Мүрүтээҕи уолаттар гимназияларын үрдүкү кылааһын үөрэнээччмлэрэ эбиэккэ диэри улуус дьаһалтатыгар управлениеларынан сылдьан тустаах салаалар үлэлэрин кытары билистилэр. Онон олохтоох салайыныы диэн хайдаҕын үлэни-хамнаһы кытары миэстэтигэр кэлэн билсэннэр, бастакы хардыылары оҥордулар. Биллэрин курдук, оскуолаларга бэйэни салайыныы күнэ ыытыллар. Онон уолаттар ону тэҥнээн көрөр, түмүк оҥорор кыахтаннылар.
Улуус дьаһалтатыгар сырыыларын түмүгэр уолаттар олохтоох бэйэни салайыныы улууспутугар саҥа киириитигэр бэйэтин кылаатын киллэрсибит, Мүрү нэһилиэгин, улуус дьокутааттарын Сэбиэтин бэрэссэдээтэлинэн үлэлээбит Иван Колодезниковы кытары көрсөннөр, кини бэсиэдэтин иһиттилэр. Онон олохтоох салайыныы туһунан чахчы элбэҕи билэн-көрөн бардылар.
Бу күн күрэхтэһиитэ суох ааһааччыта суох. Быйыл нэһилиэктэр баһылыктара, баһылыктар солбуйааччылара, нэһилиэктэр дьаһалталарын исписэлиистэрэ уонна спортинструктордара, улуус дьаһалтатын исписэлиистэрэ, нэһилиэктэр Сэбиэттэрин дьокутааттара туспа хамаанда туруораннар, барыта биэс хамаанда илин-кэлин түһүстэ. Кинилэр волейболга, дартс быраҕыыга, оҕунан ытыыга, баскетбол мээчигин корзинаҕа быраҕыыга, канат тардыһыытыгар күрэхтэстилэр.
Эбиэттэн киэһэ “Олоҥхо дьиэтигэр” тэрээһин үөрүүлээх чааһа ыытылынна. Бастатан туран, манна мустубуттары Олохтоох бэйэни салайыныы күнүнэн улуус баһылыга Василий Алексеев Москва куораттан видеосибээс нөҥүө эҕэрдэлээтэ. Кини кэккэ нэһилиэктэр баһылыктарын кытары олохтоох бэйэни салайыныы тэриллиилэр «Малая Родина – сила России» Бүтүн Россиятааҕы II форумнарыгар кытта сылдьар.
Тэрээһиҥҥэ үлэ бастыҥнара наҕараадалары туттулар. Улуустааҕы административнай хамыыһыйа бэрэссэдээтэлэ Любовь Павлова “СӨ олохтоох салайыныыга сулууспатын бэтэрээнэ” бэлиэни тутта. Тутуу уонна архитектура управленгиетын исписэлииһэ Надежда Прокопьева тутуу министиэристибэтин анал бэлиэтинэн наҕараадаланна. Улуус сирин-уотун уонна баайын дьаһайар кэмитиэт исписэлииһэ Иван Пестряков“СӨ сиргэ сыһыаннаһыыларыгар киллэрбит кылаатын иһин” бэлиэни тутта. Оттон Дүпсүн нэһилиэгин дьаһалтатын исписэлииһэ Мария Иванова, I Хоро нэһилиэгин баһылыгын солбуйааччы Виталий Гуляев “Уус Алдан улууһун социальнай-экономическай сайдыытыгар кылаатын иһин” бэлиэнэн наҕараадаланнылар. Итинтэн да элбэх араас наҕараада туттарылынна.
Олохтоох салайыныы саҥатан-саҥа таһымҥа тахсан иһэр, бөҕөргүүр. Олох-дьаһах туруктаах буолуута онтон быһаччы тутулуктаах.
Афанасий Сектяев
Хаартыскалар улуус дьаһалтатын пресс сулууспатыттан