СӨ Бырабыыталыстыбатын отчуоттуур мунньаҕар улууспут тэйиччи сытар, уустук суоллаах-иистээх Түүлээх, Бээрийэ, II Байаҕантай нэһилиэктэрэ сүөһү төбөтүгэр бэриллэр харчы үүккэ туһаайыллыбытынан үүт туттарар усулуобуйалара суоҕун ыйан туран, биһирээбэттэрин биллэрэллэр. Ону тэҥэ кытыы сытар дьоҕус нэһилиэктэри оскуола сарбыллыыта хаарыйбатыгар көрдөһөллөр. Ыччаты тыа сиригэр угуйар, тардар көдьүүстээх механизм толкуйданан үлэҕэ киирэригэр баҕараллар.
Түүлээх нэһилиэгэр Маҕантан бөртөлүөт сырыытыгар, дьону таһар катерга субсидия көрүллэрин, хаарбах туруктаах хочуолунай оннугар саҥа хочуолунай тутуутун, нэһилиэнньэни килиэбинэн хааччыйан кэлбит урбаанньыт бэкээринэтин оһоҕо алдьанан, саҥа оһох ыларга үбүнэн көмөнү, айан суолугар эргэрбит муосталары солбуйар САРМ муосталары, таараламмыт уматык эбии кэлэрин, сир оҥоруутугар мульчеры туруорустулар.
Бээрийэлэр түөрт кыбартыыралаах дьиэ программаҕа киирэн, быйыл үлэтэ саҕаланыаҕын туһунан этиини үөрэ иһиттилэр. Салгыы тыын боппуруостарын оҕо тэрилтэтин дьиэтигэр салҕааһын тутууну туруорсаллар. Оттон оскуола-сад буолар түгэнигэр республикаҕа бастакы, оттон оскуола тутуута 84-с уочаратынан турарын туһунан иһитиннэрдилэр. Ону тэҥэ олохтоохтор оскуолаҕа массыына, нэһилиэнньэҕэ уу таһар массыына, суһал массыына суоҕун этиннилэр. Ону тэҥэ уот линиятыгар өрөмүөнү, САРМ муостаны туруорсаллар.
Тиит Арыыга эдэр исписэлиистэр дьиэлэрин салгыы тутарга быйыл республикаттан үп көрүллүбүтүн үөрэ иһиттилэр. Итиэннэ быһыт оҥоруутун мелиорация көрүүтүгэр биэрэри, саҥа оҕо тэрилтэтин дьиэтин тутууну туруорустулар.
Маннык отчуоттар наадалаахтарын, туруорсубут боппуруостарыттан кыаллар өттө олоххо киирэрин учуоттаан, бу үс нэһилиэк олохтоохторо бырабыытылыстыба үлэтин сөптөөҕүнэн сыаналаатылар.
Мария Аргунова