Тохсунньу 22 күнүгэр, Саха Өрөспүүбүлүкэтигэр биллэриллибит Култуура сылын көрсө “Култуура көмүс көлүөнэтин көрсүһүүтэ” диэн улуус култууратын бэтэрээннэригэр аналлаах сыллата ыытыллар тэрээһин Олоҥхо дьиэтигэр буолан ааста. Көрсүһүүгэ тэрийэр, көҕүлүүр үлэҕэ сылдьыбыт, билигин да айар үлэ үөһүгэр сылдьар култуура бэтэрээннэрэ улууспут нэһилиэктэриттэн, Дьокуускай куораттан кэлэн кыттыыны ыллылар. Дьоро киэһэни улуустааҕы култуура үлэһиттэрин идэлээх сойууһун кэмитиэтэ (Заровняев Б.И.), култуура бэтэрээннэрин түмсүүтэ (Лугинова А.Е.) тэрийэн ыыттылар.
Тэрээһини “Олоҥхо дьиэтэ” ЭКК дириэктэрэ Айаал Аргунов алгыс сиэринэн-туомунан саҕалаата.
Истиҥ көрсүһүүнү “Тойон Мүрү” култуура дыбарыаһын исписэлииһэ Александр Гоголев иилээн-саҕалаан ыытта. Бэтэрээннэр, саастарын тухары дьону сэргэхситэр үлэҕэ сылдьыбыт буоланнар, билигин даҕаны сэргэхтэр. Манна ылбаҕай ырыа ылланна, истиҥ сэһэргэһии тэрилиннэ. Култуура эйгэтин эдэр үлэһитэ Айаал Вырдылин уонна инникигэ эрэнэр ыччаппыт, Дьокуускайдааҕы Култуура уонна ускуустуба коллеһын 2-с кууруһун устудьуона Ваня Колодезников ырыаларынан-тойуктарынан эдэрдии эрчими эбэн биэрдилэр.
Култуура бэтэрээннэрэ бүгүн ыытыллар үлэҕэ укпут укулааттара улахан. Төһө даҕаны үйэ уларыйдар, урукку уопут суураллыбат, тэлиллибит суол тумнуллубат. Бэтэрээннэр бүгүҥҥү үлэҕэ-хамнаска бэйэлэрин санааларын үллэһиннилэр, сиэрдээх этиилэри көтөхтүлэр. Көхтөөх оонньууларга дуоһуйа кыттан, күлэн-үөрэн, сэргэхсийэн, астынан тарҕастылар.
Бэйэ кэр.