Волонтердар диэн уопсастыба эбэтэр кини сорох бэрэстэбиитэллэрин туһугар тус баҕаларынан уонна босхо көмөлөһөр дьон буолаллар. Волонтер бэйэтин күүһүн уонна бириэмэтин көмөҕө наадыйааччыга аныыр, итиэннэ уопсастыбаҕа туох эрэ туһалаах дьыаланы оҥорор.
Анал байыаннай дьайыы саҕаланыаҕыттан волонтердар тустарынан киэн тутта көрөбүт-истэбит. Волонтердары билигин тыыл бэтэрээннэригэр холуу саныыгын. Саха сириттэн байыаннай дьайыыга сылдьар байыастарбытыгар волонтердар көмөлөрө улахан, дьоһун суолталаах. Бүгүн улууспут хаһыатын ааҕааччыларыгар анаан волонтер кэрэ аҥаар туһунан сырдатыахпын баҕарабын. Ол курдук биһиги оскуолабыт минньигэс асчыта Туяра Егоровна Москвитина 1970 сыллаахха тохсунньу 22 күнүгэр күн сирин көрбүтэ.
Амарах санаалаах асчыт, аһыныгас сүрэхтээх кэрэ аҥаар 2022 сыллаахха анал байыаннай дьайыыга саҕаланыаҕыттан кыттыыны ыла сылдьан бааһыран госпитальга сытар оскуолабыт выпускнигар баһыылканан буспут тоҥ ас ыытыыга биир бастакынан дьону ыҥыран туран көмөҕө кыттыспыта. Онтон 2023 сыллаахха кыайыыга угуттуур «Илии сылааһа» иистэнэр сыахтарга кыттыһан, анал байыаннай дьайыы кыттыылаахтарын таҥас-сап өттүнэн хааччыйыыга үлэлэспитэ. 2024 сыл олунньу 19 күнүттэн үлэлиир оскуолатын кэлэктиибигэр маскировочнай сетка өрүүтүгэр саҕаланыаҕыттан бүтүөр диэри олорон ылбатаҕа.
Ону тэҥэ, улуус көмө оҥорор аахсыйатыгар кыттыһан бэрэски астаһан, тоҥ ас, ичигэс таҥас, эмп-томп хомуйуутугар үлэлэспитэ. Быйыл тохсунньу 26 күнүгэр Дьокуускайга киирэн, «Илии сылааһа» иистэнэр сыахха саллааттарга тактическай көстүүм тигиитигэр үлэлэспитэ. Оттон муус устарга анал байыаннай дьайыы кыттыылаахтарыгар көмөҕө улуус ыҥырыытыгар кыттыһан, таҥас-сап тигиитигэр көмөлөспүтэ. Ону тэҥэ, бу аҕыйах хонуктааҕыта улуус ыҥырыытынан гуманитарнай көмөҕө кыттыһан, саллааттар мал-сал уктар мөһөөччүктэрин тигиигэ кыттыста.
Туяра Егоровна: «Ийэ дойдубутун көмүскүү сылдьар хорсун саллаат уолаттарбытыгар бөҕө санааны, санааларын түһэрбэттэригэр, улахан эчэйиилээх да буоллахтарына, олоххо тардыһыыны баҕарабын», – диэн ыра санаатын этиитинэн түмүктээтэ.
Нюргуяна ХОРУНОВА, Сыырдаах орто оскуолатын иитэр үлэҕэ дириэктэри солбуйааччы