Г.Г. Никифоров аатынан улуустааҕы киин балыыһа хирургия салаатыгар алтынньы 14-16 күннэригэр Өрөспүүбүлүкэтээҕи офтальмологическай балыыһаттан харах хирурдара кэлэн, катаракта эпэрээссийэтин улуус олохтоохторугар оҥордулар. Улууспут киин балыыһатын офтальмолог бырааһа Василена Сухова эрдэттэн операцияны ааһыан сөптөөх ыарыһахтары сүүмэрдээбитэ. Ыарыһахтар итиэннэ эмтиир быраастарын нөҥүө анализтарын ааһан, эрдэттэн бэлэмнэнэн көрүстүлэр. Бу иннинэ улууспутугар маннык офтальмолог хирурдар анал биригээдэлэрэ 2021 сыллаахха кэлэ сылдьыбыттааҕа. Ол кэмҥэ барыта 43 киһини эпэрээссийэлээбиттэрэ. Ол кэннэ Дьокуускайга анал автобуһунан күрүөмүнэн талыллан киирэн эпэрээссийэни ааспыт түгэннээхтэрэ.
Оттон быйыл алтынньы 14 күнүгэр 30 киһи катаракта ыарыытыттан анал эпэрээссийэни аастылар. Барыта 72 киһи оҥоһуллара быһаарылынна. Эпэрээссийэ 15-20 мүнүүтэ устата икки укуол кэнниттэн оҥоһуллар. Алтынньы 15 күнүгэр, иккис күннэригэр, 29 киһи эпэрээссийэлэннэ, олортон 14 киһи иккис хараҕар оҥоттордо. Сымнаҕас илиилээх, амарах сүрэхтээх харах хирурдарынан Екатерина Петровна Басова, Сардаана Алексеевна Сметанина, медсиэстэрэлэринэн Айталина Михайловна Хобусарова, Екатерина Ивановна Стручкова үлэлээтилэр. Итиэннэ олохтоох офтальмолог быраас Василена Сухова, фельдшер Мария Михайлова, хирургия салаатын анестезист медсиэстэрэтэ Ульяна Лыткина ыарыһахтары эпэрээссийэҕэ бэлэмнииргэ көмөлөстүлэр.
Улуус нэһилиэктэриттэн кэлэн кыһалҕаларын олохтоох сирдэригэр быһаартарбыт ыарыһахтар астыммыттарын биллэрдилэр. Ол курдук Баатаҕайтан 76 саастаах Мария Аманатова, Курбуһахтан 79 саастаах Ирина Костромина, 77 саастаах Парасковья Аммосова, Бороҕонтон 80 саастаах Агафья Васильева, 70 саастаах Варвара Алексеева, Чараҥтан 74 саастаах Зоя Кривошапкина, Тумултан Семен Поисеев, Бэйдиҥэттэн 70 саастаах Спиридон Алексеев күн сырдыгын ыраастык көрөр кыаҕы биэрбит эмчиттэргэ барҕа махталларын тиэрдэллэр. Инникитин да маннык тыа сиригэр олорор сааһырбыт, Дьокуускайга кэлэр-барар, көрдөрүнэр, сырыыны ыарырҕатар дьоҥҥо көмө буолан, миэстэтигэр кэлэн эпэрээссийэлээн үтүөрдэллэригэр инники баҕа санааларын тиэртилэр.
Светлана Сивцева
Мария Аргунова хаартыскаҕа түһэриилэрэ