Ахсынньы 22 күнүгэр энергетиктэр идэлээх бырааһынньыктарын бэлиэтииллэр. Биһиги улууспутугар уот хаһаайыстыбатын көрөн-истэн үлэлиир тэрилтэнэн Бороҕоннооҕу РЭС буолар. Күн бүгүн Бороҕоннооҕу РЭС-кэ киин производственнай баазаҕа, үс сетевой учаастакка (Дүпсүҥҥэ, Суоттуга, Тандаҕа), икки монтерскай пууҥҥа (Балыктаахха, Курбуһахха) барыта 69 киһи үлэлиир. Кинилэр 35 нэһилиэнньэлээх пууҥҥа барыта 13 подстанцияны, 492,89 км усталаах 0,4 кВ күүрүүлээх, 749,50 км усталаах 10 кВ күүрүүлээх уот ситимнэрин үлэтин хааччыйаллар. Дьыл хайа даҕаны кэмигэр күнү-түүнү аахсыбат ыарахан үлэҕэ чахчы үлэлэригэр бэриниилээх, идэлэрин ис сүрэхтэриттэн таптыыр дьон үлэлииллэр. Бүгүн ол туһунан Бороҕоннооҕу РЭС начаалынньыга Николай Седалищевтыын кэпсэттибит.
Кини: «Кэлэктииппитигэр 30-тан тахсалыы, 30-ча сыл старшай маастар Юрий Юрьевич Артамонов, старшай диспетчер Ивандар Иванович Лыткин, электромонтер Василий Васильевич Пестряков, маастардар Андрей Андреевич Ховров, Владислав Васильевич Колодезников, ГТУ машиниһа Виктор Ильич Винокуров, электромонтер Сергей Иванович Протопопов, автокран суоппара Василий Васильевич Мырсанов, автовышка суоппара Алексей Кимович Мигалкин, диспетчер Егор Валентинович Тарабукин бэриниилээхтик үлэлииллэр. Итини таһынан кэлэктиип тумус туттар үлэһиттэрэ суоппар Петр Петрович Гоголев, бульдозер машиниһа Григорий Григорьевич Корякин, диспетчер Василий Михайлович Савельев бааллар.
Бочуоттаах сынньалаҥҥа олорор бэтэрээннэрбитинэн – 29 сыл начаалынньыгынан үлэлээбит Николай Петрович Алексеевы, кини кэргэнин, технигынан үлэлээбит Александра Александровна Алексееваны, 42 сыл устата делопроизводителлаабыт Наталья Ивановна Константинованы, сибээс электромонтера Александр Гаврильевич Константиновы, электромонтер Василий Федосеевич Бурнашеву, кылаабынай инженердээбит Сергей Иванович Васильевы, электромонтердары Роман Романонович Олесовы, Николай Алексеевич Ксенофонтовы, уокка холбооһун инженерэ Афанасий Егорович Сивцевы, о.д.а. киэн тутта ааттыыбыт, кинилэри холобур оҥостобут, билсэ-көрсө олоробут.
РЭС уустук үлэтигэр дьиэ кэргэттэр көлүөнэлэрэ солбуйсара кэрэхсэбиллээх. Ол курдук электрогазосварщик Александр Литвинович Корнилов уола Александр Александрович ГТУ машиниһынан, инженер Сергей Георгиевич Иванов кэргэнэ Оксана Петровна кладовщигынан, уоллара Сергей Сергеевич контролерунан, диспетчер Егор Валентинович Тарабукин уола Валентин Егорович электромонтерунан, Тиит Арыытааҕы ДЭСкэ машинистаабыт, электромонтердаабыт Михаил Васильевич Савельев уола Василий Михайлович, ветераммыт Сергей Иванович Васильев уола Иван Сергеевич диспетчерынан үлэлииллэр.
Убаастабыллаах кэллиэгэлэрбин, биир идэлээхтэрбин Энергетик күнүнэн эҕэрдэлиибин! Үлэҕитигэр ситиһиилэри, дьиэ кэргэҥҥитигэр туруктаах олоҕу баҕарабын», – диэн билиһиннэрдэ, эҕэрдэтин тиэртэ.