Курбуһах нэһилиэгин «Чуораанчык» оҕо саадын музыкальнай салайааччыта Мария Аммосова авторскай сахалыы ырыаҕа «Көмүс дорҕоон» улуустааҕы күрэһи «Музыка для всех» республикатааҕы бырайыак чэрчитинэн 2017 сылтан ыытар. Маҥнайгы саҕалааһыннарын уһуйааммыт музыка кэрэ эйгэтигэр талааннаах кэллиэгэбит Светлана Гуляевалыын иилээн-саҕалаан олоххо киллэрэн, элбэх кыттааччылаах интэриэһинэй күрэс оҥорон ыыппыттара. Онтон кынаттанан кэнники сылларга Мария Егоровна бэйэтэ салайар буолбута.
Ыытыллыбыт күрэстэргэ Бороҕонтон, Арыылаахтан, Эһэлээхтэн, Чараҥтан, Хомустаахтан, Хоноҕортон, Тумултан, Мындаабаттан, Дыгдаалтан, Сыырдаахтан уонна бэйэбит уһуйааммыт дьиэ кэргэттэрэ оҕолорунаан музыка араас хайысхаларынан сахалыы инструменнарга оонньоон, ыллаан көхтөөх кыттыыны ылбыттара. 2020 сыллаахха Мария Егоровна «Көмүс дорҕоон» авторскай күрэһин республика иһинэн ыыппыта. Манна барыта 13 дьиэ кэргэн 5 улуустан уонна Дьокуускайтан күөн-көрсөн бэрт тыҥааһыннаах күрэхтэһии буолан ааспыта. Бу сыллар тухары бары күрэхтэһээччилэр ох курдук оҥостон, таҥнан-симэнэн, араас сахалыы музыкальнай инструменнарга оонньоон, ыллаан-туойан дьиэ кэргэн талаанын дьэҥкэтик арыйан кыттыбыттара. Дьүүллүүр сүбэҕэ муусукаҕа сыһыаннаах дьон үлэлээн кэлбиттэрэ.
Быйылгы күрэһи музыкальнай салайааччы Мария Егоровна уонна уһуйааммыт профкомуттан Светлана Юрьевна «Ийэ тыл эйгэтэ» республикатааҕы бырайыак чэрчитинэн уонна Россияҕа Дьиэ кэргэн, республикаҕа Оҕо саас, Уус Алдаммытыгар Аҕа сылларыгар аанаммыт тэрээһиннэри түмүктүүр сыаллаах тэрийдилэр. Күрэһи детсадпыт «Табыкчаан» бөлөҕө күпсүүргэ үүрдүк күүрүүлээхтик оонньоон саҕалаата. Сэбиэдиссэй Елена Ивановна киирии тыл этиитин кэнниттэн Курбуһах нэһилиэгин баһылыгын солбуйааччы Анастасия Аммосова Саха Республикатын Ил Дарханын Граныгар кыайбыт «Ийэ тыл эйгэтэ» бырайыак силигин ситэрин туһугар өссө таһаарыылаахтык, ситиһиилээхтик салгыы үлэлииргэ анаан детсадка 2 микрофону, микрофон стойкатын бэлэх уунна.
Кыттааччылар бэлэмнэрин, толорор нүөмэрдэрин таһымын көрөн олус астынныбыт: норуот ырыаларын толордулар, сахалыы араас инструмеҥҥа ырыаларын доҕуһуоллаан сөхтөрдүлэр, оһуохайдаан да ыллылар.
Кыттааччылар нүөмэрдэрин быыһыгар детсад кэлэктиибэ норуот ырыаларынан көрөөччүлэргэ, иитиллээччилэргэ музыкальнай бэлэх уунна. Түмүк тахсар долгутуулаах түгэнигэр кылтан-сиэлтэн оҥоһуктарынан дьарыктанар элбэх оҕолоох дьиэ кэргэн ийэтэ Альбина Аммосова детсад саха хоһугар кырачаан оҕолорго саха төрүт культуратын үөрэтэргэ диэн сөрүө, эттэрин-сииннэрин чэбдигирдэргэ анаан сиэл мээчиктэринэн оҥоһуллубут массажтыыр көбүөрү бэлэх уунан соһутта, олус үөртэ.
Дьүүллүүр сүбэҕэ үрдүк ирдэбиллээхтик бары сатабылларын ууран Саха республикатын культуратын туйгуна А.И. Аммосова, «Сандал» сынньалаҥ киинин фольклорга салаатын специалиһа Милена Рязанская, «Чуораанчык» детсад фольклорга уһуйааччыта Оксана Васильева үлэлээтилэр. Тыҥааһыннаах күөн көрсүһүү түмүгүнэн бары даҕаны эрбии биитин курдук биир тэҥник үчүгэйдик кыттаннар, 3-с миэстэни Айсаан, Айысхан Копыриннар ийэлэринээн Нария Ивановналыын ыллылар уонна детсад профкома анаабын бэлэҕин туттулар; 2-с миэстэҕэ Уйгулаана Винокурова дьиэ кэргэнинээн: эбэтэ Елена Николаевна, ийэтэ Мария Александровна, аҕата Николай Федорович, балта Алгыстаана уонна убайа Алтан буолан таҕыстылар. Улахан дьиэ кэргэн детсад сэбиэдиссэйин бирииһин тутта. Биэтэккэ 1-кы миэстэҕэ Сияна Слепцова ийэтинээн Айтана Андреевналыын тахсан кэллилэр. Кинилэр детсадпыт ветераннара олохтообут бириистэрин тутан үөрүүлэрэ үрдээтэ.
Бу курдук детсадпытыгар өссө биир тэрээһин үөрүүлээх быһыыга-майгыга үрдүк таһымҥа буолан ааста.
Елена Наумова, «Чуораанчык» уһуйаан сэбиэдиссэйэ