Бэҕэһээ, ахсынньы 11 күнүгэр, коллегабыт Ольга Татаринова аҕата Мүрү нэһилиэгэр олорбут, айбыт-туппут рационализатор, суруйааччы, общественнай корреспондент, биэс кинигэ автора, Уус Алдан улууһун бочуоттаах олохтооҕо, Аҕа дойду Улуу сэриитин инбэлиитэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ Михаил Николаевич Тролуков төрөөбүтэ 100 сылыгар аналлаах тэрээһин чэрчитинэн кини үлэтин, олоҕун-дьаһаҕын көрдөрөр «Айар-тутар абылаҥ» быыстапка арыллыыта уонна оҕолоро таһаартарбыт кинигэлэрин сүрэхтэниитэ үрдүк тэрээһиннээхтик буолан аастылар.
Быыстапка аһыллыытыгар Сэһэн Ардьакыап аатынан историяны, кыраайы үөрэтэр улуустааҕы түмэл үлэһиттэрэ, биир түөлбэҕэ олорбут үөлээннээхтэрэ, кэлбит ыалдьыттар, кыыһа Ольга Михайловна олус истиҥник ахтан-санаан, Михаил Николаевич үлэлээбит үлэтин, айар дьоҕурун, сатабылын сырдатан көрдөрөр экспонаттарынан, матырыйаалларынан сирдэтэн киһи истэн сөҕөр гына кэпсээтилэр. Оттон Михаил Николаевич сиэрдээх майгытын, үтүө холобурдарын туһунан кийиитэ ис дууһатыттан кэпсээтэ.
Оҕолоругар ордук долгутуулаах уонна үөрүүлээх түгэнинэн Василий Степанович Парников Михаил Николаевич эт илиитинэн оҥорон киниэхэ бэлэхтээбит дьүрүскэннээх тыастаах хомуһугар олус сатабыллаахтык оонньоон баран, бу хомуһун өйдөбүнньүк буола сырыттын диэн кыыһыгар Ольга Михайловнаҕа туттарбыта буолла.
Мүрүчээнэ уһуйаантан Ольга Михайловнаныы кытта Луиза Бурнашева, Ефросинья Ушницкая уонна Маргарита Копырина бу арыллыыга Михаил Николаевич төрөөбүт дойдутун, таптыыр-ахтар Нэлэгэрин туһунан суруйбут хоһоонун аахтылар. Быыстапка биир ый устата түмэлгэ турарын туһунан биллэрдилэр.
Салгыы «Айар-тутар абылаҥ» кинигэ биһирэмэ улуус киин бибилиотекатыгар буолла. Кыыһа Ольга Михайловна бу кинигэҕэ эрдэ бэчээттэммэтэх айымньыларын, төрүччүлэрин уонна оҕолорун, чугас аймахтарын дьиэ кэргэттэрин туһунан ахтыылары киллэрбитин кэпсээтэ. Ыытааччы СӨ Ил Түмэн Бэрэссэдээтэлин бастакы солбуйааччы Александр Жирков ыыппыт телеграмматын ааҕан иһитиннэрдэ. Суруналыыс Бээрийэ кыыһа Хотойук Айгыына кинигэни ырытыытын медиа-презентациянан билиһиннэрдилэр.
«Кыым» хаһыат мененджерэ М.М. Корнилова, Михаил Тролуков улахан кыыһа Агафья Михайловна бииргэ үөрэммит Мүрү 1 нүөмэрдээх орто оскуолатын 1975 сыллааҕы «көмүс» үбүлүөйдээх выпускниктара, Василий Парников, Галина Иванова-Айтыына, Клавдия Васильева, Варвара Окоемова, Февронья Федорова, Окоемовка оскуолатыттан Геннадий Пестряков, Е.В. Местников аатынан Окоемовка мобильнай библиотекатын сэбиэдиссэйэ Любовь Местникова, Мүрү 1 нүөмэрдээх орто оскуолатын түмэлин аатыттан Елена Сыроватская Михаил Николаевич Тролукову уус, мындыр өйдөөх, суруйааччы, айааччы, тутааччы быһыытынан истиҥ сылаас тылынан сырдатан, айымньыларын ахтан-санаан, сүгүрүйэн, махтанан, хайҕаан аастылар.
Бу тэрээһиҥҥэ анаан улуустааҕы кииннэммит библиотека тиһигин үлэһиттэрэ оҕолорго уонна улахан дьоҥҥо «Айылҕа Ийэҕин харыстаа» тиэмэҕэ хоһоон улуустааҕы күрэһин ыыппыттарын түмүгүн дьүүллүүр сүбэҕэ үлэлээбит Галина Иванова-Айтыына уонна Галина Аммосова иһитиннэрдилэр. Онно: улахан дьоҥҥо 3-с миэстэни – Петухова М.М., 2-с миэстэни – Иванова М.А., 1-кы миэстэни Парникова Е.С. ыллылар. Биһирэбил бириис Дьокуускай куорат олохтооҕо Кудрина М.А. ананна; оҕолор эмиэ дэгиттэр талааннаахтарын этэн туран, 3-с миэстэ – Бэйдиҥэ орто оскуолатын 10 кылаас үөрэнээччитэ Григорьева Дайаанаҕа, 2-с миэстэ – Чэриктэй орто оскуолатын 8 кылааһын үөрэнээччитэ Дмитриева Айхаанаҕа, 3-с миэстэ Мүрү 1 нүөмэрдээх орто оскуолатын 11 кылаас үөрэнээччитэ Черепанов Олегка анаммытын иһитиннэрдилэр, биһирэбил бирииһи Бэйдиҥэ орто оскуолатын үөрэнээччитэ Черемкина Полинаҕа анаатылар.
Онтон «Мүрү саһарҕата» хаһыат редакция ыыппыт публицистика истиилинэн «Аныгы олох кыһалҕалара» тиэмэҕэ суруйуу улуустааҕы күрэс түмүгүн шеф-редактор Диана Седалищева иһитиннэрдэ: манна 10 киһи кыттыбытыттан 3-с миэстэни – Парников В.С., 2-с миэстэни – Васильева К.И., 1 -кы миэстэни Өспөх нэһилиэгин олохтооҕо Румянцев А.А. ылары ситистилэр, кыттыбыттарга барыларыгар туоһу суругу туттардылар.
Түмүгэр Михаил Николаевич хос сиэннэрэ Лев, Инесса, Станислав хос эһэлэрин хоһоонун өйтөн ааҕан дьон биһирэбилин ыллылар.
Михаил Николаевич оҕолоро саҥа сүрэхтэммит кинигэни түмэлгэ, улуустааҕы киин библиотекаҕа, Мүрү 1№дээх оскуолатын, «Мүрүчээнэ» уһуйаан библиотекаларыгар, «Сарыал» уһуйаан бэтэрээннэригэр бэлэх ууннулар.
Маргарита Копырина, Луиза Бурнашева, Лилия Сивцева, «Мүрүчээнэ» д/с үлэһиттэрэ