Улуустааҕы оҕо библиотеката оҕолору күһүҥҥү сынньалаҥҥа «Кинигэҕэ сынньалаҥ диэн суох» диэн тэрээһин тула түмэ тарта.
Оҕолорго «Мин дьиэтээҕи кыылым» диэн тэрээһиҥҥэ быыстапка, бэсиэдэ тэрилиннэ, оҕолор дьиэтээҕи кыылларын туһунан кэпсээтилэр, маастар-кылаас ыыттылар. Мүрүтээҕи юннатскай станция педагога Алексей Винокуров чыычаахтар тустарынан коллекциятын быыстапкатын кэпсээтэ, иитиллээччилэрэ илдьэ кэлбит попугайдарын, хомяк туһунан кэпсээтилэр. Саха суруйааччыта, фронтовик поэт Тимофей Сметанин төрөөбүтэ 105 сылын көрсө «Мэхээлэчээн булчут оонньуулара» көрдөөх күрэхтэһии, «Найди клад в Книгограде» квест оонньуу ыытылынна.
Ааҕааччыларбыт күн аайы библиотекаҕа сылдьан кинигэ уларсан, «Счастливый формуляр» оонньууга кыттыыны ыллылар.
Сомоҕолоһуу күнүн көрсө «Хоровод дружбы»диэн быыстапканан улуустааҕы «Умсулҕан» коллекционердар түмсүүлэрин чилиэнэ Мария Борисова коллекциятын иһитиннэрдэ. Мүрү 2 №-дээх орто оскуолатын 2-с кылааһын үөрэнээччилэрэ Айсиэн Аянитов, Эмма Черкашина бэйэлэрин коллекцияларын туһунан сырдаттылар.
Оҕолор хас биирдии тэрээһинтэн элбэҕи билэн, көрөн-истэн, бириис тутан үөрэн-көтөн тарҕастылар, күһүҥҥү сынньалаҥнарын туһалаахтык атаардылар.
Надежда Гоголева, улуустааҕы оҕо библиотекатын библиотекара