Бүгүн «Тойон Мүрү» култуура дыбарыаһыгар кэрэ эйгэлээх тэрээһин үгүс киһини угуйда. Улууспутугар Ийэ, Аҕа күннэригэр аналлаах ый чэрчитинэн олохтоох оҥорон таһаарааччылар быыстапка-дьаарбаҥкалара буолла.
Тэрээһини улуус дьаһалтатын социальнай уонна ыччат политикатын салалтата, В.В. Никифоров-Күлүмнүүр аатынан «Тойон Мүрү» культура дыбарыаһа, бибилэтиэкэ кииннэммит тиһигэ, «Мин бизнеһим» киин тэрийэн ыыттылар. Манна илиилэригэр талааннаах улууспут олохтоохторо Руслана Куриянова уруһуйдарын (Тулуна), Василена Сухова кондитерскай бородууксуйатын (Мүрү), Настя Семенова акрилтан сувенирдарын, Лилия, Туяра Бережневалар симэхтэрин, Матрена Слепцова заколкаларын, бантиктарын, Марианна Мандарова эпоксиднай сымаланан эгэлгэ оҥоһуктарын, Анна Бурнашева оҕуруоттан киэргэллэрин, Алдана Тарская оҕуруо киэргэллээх симэхтэрин, мастан оҥоһуктарын, Татьяна Васильева гипсэттэн оҕоһуктарын, Татьяна Кириллина мыылаларын, Гаврил Черноградскай үлэлэрин хаартыскаларын дьон-сэргэ сонурҕуу, сэҥээрэ көрдө, атыыласта.
Ону таһынан, Оксана Тарская макраме өрүүгэ, Елена Слепцова туораахтаах ытарҕаны оҥорууга, Варвара Бурцева быысапкаҕа, заколка оҥорууга, Александра Черкашина эмтээх оттору туһанарга, чүмэчи оҥорорго, Таисия Базарова мехенди уруһуйгдуурга, Сусанна Аммосова кырдаһынтан тигиигэ, Екатерина Горовцева лозаны өрүүгэ баҕалаахтарга удамыр сыанаҕа маастар кылаастары ыыттылар.
Ити курдук, быыстапка-дьаарбаҥкаҕа кэлбит хас биирдии киһи туохха эрэ үөрэнэн, көрөн-истэн кынаттанан, ыралаабыт малын булан-талан, хараҕы сымнатан, дууһаны сылаанньытан үөрэн-көтөн тарҕастылар.
Мария АРГУНОВА