Улуустааҕы социальнай кэлим киин стационарнай отделениетын базатыгар сайын устата үлэлээбит «Кустук» оҕо сайыҥҥы былаһаакката 3-с сезонун атырдьах ыйын 21 күнүгэр түмүктээтэ.
Быйыл сайын устата тастан 30 оҕо уонна стационар иитиллээччилэрэ, барыта 50 оҕо хабыллан үс хайысханан эт-хаан, өй-санаа өттүнэн бэйэлэрин сайыннардылар, элбэҕи биллилэр-көрдүлэр, саҥа үөрүйэхтэри иҥэриннилэр, сатабыллары баһылаатылар. Оҕолору кытары элбэх специалист үлэлэстэ: социальнай педагогтар, иитээччилэр, медиктэр, психологтар. Тэрилтэ үлэһиттэрэ суоппартан саҕалаан поварга тиийэ бары оҕолор тустарыгар кыһаллан үлэлээтилэр.
Түмүк таһаарар быһаарыылаах дьоро күнү «Арчылаана» фольклорнай бөлөх оҕолоро күпсүүрүнэн саҕалаатылар, иитээччи Татьяна Свинобоева уратытык иилээн-саҕалаан ыытта. Улуустааҕы социальнай кэлим киин салайааччытын эбээһинэһин толорооччу Айна Ильина, стационарнай отделение сэбиэдиссэйэ Светлана Бурцева, «Өркөн» оҕону эбии үөрэхтээһин киинин педагога Иван Иванов иитиллээччилэргэ эҕэрдэ тылларын, баҕа санааларын анаатылар. Төрөппүт Сардана Готовцева бу былаһааккаҕа икки кыра уола икки сезоҥҥа субуруччу сылдьыбыттарын, наһаа сөбүлээбиттэрин, элбэҕи билбиттэрин, сайдыбыттарын иһин тэрилтэ үлэһиттэригэр истиҥник махтанна уонна үөрэх дьыла чугаһаабытынан стационар иитиллээччилэригэр үөрэх тээбириннэрин бэлэхтээтэ. Тэрээһини музыка учуутала идэлээх иитээччи Надежда Свинобоева байаан тыаһынан ураты тыыннаата, оҕолору барыларын күргүөмүнэн ыллатта. Үөрэ-көтө ыллыы турар оҕолору көрөр-истэр үчүгэйин эриэхсит! Салгыы оҕолор хоһоон аахтылар, ыллаатылар, үҥкүүлээтилэр. Онон тугу сатаабыттарын, астыммыттарын, сөбүлээбиттэрин чахчы биллэрдилэр. Күндү кэнсиэри түмүктээн кылыһахтаах куоластаах Сулусчаана Горохова барыларын ньиргиччи оһуохайдатта. Социальнай педагог Лиана Иннокентьева оҕолорго ким туох ситиһиилээҕинэн анал ааттары, маастар-кылааска бэйэлэрэ оҥорбут харысхалларын туттартаата. Иитиллээччилэргэ бэйэлэрин эҕэрдэлэрин дуэтынан кэрэ куоластаах үлэһиттэр Варвара Сидорова уонна Надежда Свинобоева тиэртилэр.
Түмүккэ сэдэх идэлээх ыалдьыт Иван Иванов дрон көтүтэн көрдөрбүтүн, оҕолорго бэйэлэригэр боруобалаппытын олус сэҥээрдилэр. Онон оҕолор сайыҥҥы сынньалаҥнарын, бэйэлэрин үлэлэрин түмүгүттэн дуоһуйан, минньигэс астаах остуол тула олорон аһаан, бу күнтэн астынан, эһиил эмиэ кэлиэх буолан үөрэн-көтөн тарҕастылар.
Светлана Бурцева, уопсас. кэрэсп.