Самаан сайын кэрэтэ салҕанар. Алааска, сыһыыга от-мас эмиэ ситэр. Аныгы үйэ дьоно мэлдьи күүрүүгэ сылдьабыт. Ол доруобуйаҕа охсор, киһи сатаан утуйбат, уоскуйбат буолар. Биллэрин курдук, аптека эмэ элбэх хиимийэлээх. Этэллэрин курдук, биир уорганы эмтээри иккис уорганы элэтиэххэ сөп. Онуоха аттыбытыгар үүнэн турар үүнээйини болҕойор суолталаах. Бүгүн Патриния скальная, ол эбэтэр таас патринията диэн эми билиһиннэриэхпит. Норуокка биллэр аата – “безразличка”.
Патриния скальная (таас патринията)
Эмтээх валериана курдук туттуллар. Сыыр, мыраан тэллэҕэр, өрүс кытылыгар үүнэр. Саас ото ситэ тахса илигинэ, күһүн хагдарыйбытын кэннэ силиһин ылыллар. Бу от уоскутар, утутар, быччыҥы сымнатар дьайыылаах. Онон утуйарга эрэйдэнэр, күүрэ сылдьар дьоҥҥо олус барсар. Сүрэх, ис уорган ыарыыларыгар туттуллар. Иһи-үөһү ыраастыыр. Тыҥа ыарыытыгар эмиэ туһалаах. Былыр сэллик кэмигэр патринияны киэҥник туттубуттар. Куртах ыарыытыгар иһиллэр. Быары ыраастааһыҥҥа эмиэ иһэллэрэ биллэр. Силиһин түөрэн ылан, тиэргэн иһигэр үүннэриэххэ сөп.
Патриния химиичэскэй састаабыгар сапонина, фруктоза, рамноза, ксилоза, олеаниловай кислота, А, С, Д битэмиин уонна эфирнэй арыы курдук туһалаах эттиктэр бааллар. Силиһигэр элбэх алкалоидтаах. Сайын иккис аҥаарыгар биитэр күһүн үргэнэрэ ордук. От силиһин сыыһыттан-буоруттан ыраастаан баран, бытархай гына кырбаан, күн көрбөт сиригэр салгыҥҥа хатарыллар.
Хайдах иһиллэрий?
2 остолобуой ньуоска хатарыллыбыт силиһи 200 г сылаас ууга 2 чаас устата сөрүүн сиргэ көөнньөрөн баран, 1 остолобуой ньуосканан аһылык кэнниттэн күҥҥэ иккитэ иһиллэр.
Уйаара КУСТУК.