Чурапчыга илин эҥээр улуустар баһылыктара, бэрэстэбиитэллээх уорганнарын бэрэссэдээтэллэрэ, улуустар бэрэстэбиитэллэрэ түмсэн, олохтоох бэйэни салайыныыга киириэхтээх сокуон тула кэпсэтиилэрэ тэрилиннэ. Мунньахха Уус Алдан улууһуттан депутаттар сэбиэттэрин бэрэссэдээтэлэ Иннокентий Аммосов, улуус дьаһалтатын нэһилиэктэр баһылыктарын кытта үлэҕэ отделын салайааччы Сергей Шепелев уонна нэһилиэктэр баһылыктара кытыннылар.
Мунньаҕы СӨ Ил Түмэнин олохтоох бэйэни салайыныы сис кэмитиэтин бэрэссэдээтэлэ Владимир Прокопьев уонна СӨ Бырабыыталыстыбатын Олохтоох бэйэни салайыныы департаменын салайааччыта Иван Попов, СӨ олохтоох бэйэни салайыныы оройуоннарын сэбиэтин бэрэссэдээтэлин быһыытынан Чурапчы улууһун баһылыга
Степан Саргыдаев иилээн-саҕалаан ыыттылар.
«Сүрүн кэпсэтии – киирбит этиилэри чопчу быһаарыы, ырытыы буолла. Саха сириттэн бу сокуон бырайыагар тоҕус улахан көннөрүү киирбитэ. Итиэннэ алтынньы 25-27 күннэригэр Москваҕа регионнар делегациялара тиийэн ырытыһыыга кыттыахтаахтар. Онтон бырайыак иккис ааҕыыга киириэхтээх.
«Бу сокуону ылыннахтарына, тыа сирин нэһилиэктэрин олоҕор-дьаһаҕар туох уларыйыы буоларый?» диэн ыйытыы үгүспүтүн долгутар. Сүнньүнэн, билигин үлэлиир 131 нүөмэрдээх Федеральнай сокуон уларыйан, саҥардыллан биэриэҕэ. Уокурук диэн өйдөбүл киирэн, биир сүнньүлээх былаас киириэҕэ эрээри, нэһилиэктэр баһылыктара, сирдэрэ-уоттара оннунан хаалалларыгар үлэ ыытыллыахтаах», – диэн Иннокентий Аммосов билиһиннэрдэ.
Мунньах түмүгүнэн туруорсуулар, этиилэр боротокуолга киирбиттэр. Салгыы Ил Түмэҥҥэ улахан ырытыһыы былааннанар, онтон хайаан даҕаны нэһилиэнньэҕэ тиэрдэр публичнай иһитиннэриилэр тэриллиэхтэрэ.
Ольга ШЕПЕЛЕВА